२३ (पान ३ साठी, अॅंकर)

अलिशान मोटारचालकांचा २० लाखांचा दंड थकित

८० जणांकडून १७ लाखांची वसुली; वाहनांवर न्यायालयात खटलेही दाखल

रत्नागिरी, ता. १२ ः अनेकांची मोटार आलिशान असली तरी वाहतूक नियम वारंवार मोडले जातात. गेल्या वर्षभरात वाहतुकीचे उल्लंघन करणाऱ्या जिल्ह्यातील ६३० वाहनधारकांविरुद्ध विविध गुन्ह्यांतर्गत कारवाई करण्यात आली. त्यापैकी ८० वाहनचालकांकडून १७ लाख ३९ हजार ५३२ रुपये दंड वसूल करण्यात आला; मात्र आलिशान गाड्या चालवणाऱ्या ५५० कारचालकांकडून अजूनही २० लाख रुपये दंड थकवला गेला असल्याची माहिती जिल्हा वाहतूक शाखेकडून मिळाली.
जिल्हा वाहतूक शाखेच्या काळ्या यादीत मुळातच अवैध प्रवासी वाहतूक, मद्यपी वाहनचालक आहेतच; परंतु आता आलिशान कारचालकदेखील वाहतूक पोलिसांच्या रडारवर आहेत. वाहतुकीच्या नियमांचे उल्लंघन करणाऱ्या वाहचालकांवर ई-मशिनद्वारे कारवाई केली जाते. त्यानंतर त्या कारवाईबाबतचा मेसेज संबंधित वाहनमालकाला जातो. त्यानंतर त्यांनी दिलेल्या मुदतीत आकारण्यात आलेला दंड वाहतूक शाखेत भरायचा आहे. गेल्या वर्षभरात वाहतूक नियमांचे उल्लंघन करणाऱ्या ६३० जणांविरुद्ध कारवाई करण्यात आली होती. त्यापैकी काहीजणांकडून १७ लाख ३९ हजार दंड वसूल करण्यात आला; १४९ वाहनांवर न्यायालयात खटले दाखल करण्यात आले आहेत. थकबाकी वसुली अजूनही सुरू आहे.
--------------
...तर वाहन जप्ती
पोलिसांच्या काळ्या यादीत असलेली वाहने किंवा मद्यप्राशन करून चालवली जाणारी वाहने जप्त करण्याचे अधिकार वाहतूक पोलिसांना दिले आहेत. अशी वाहने जप्त करून दंड केला जातो. ५५० वाहनचालकांकडे अजूनही २० लाखांची थकबाकी आहे. काहींवर खटले दाखल झाले आहेत.
-
दंड न भरल्यास नोटीस

वाहतुकीच्या नियमांचे उल्लंघन करणाऱ्या वाहनचालकाकडून दंड वसूल केला जातो. दंडाची रक्कम मुदतीत न भरल्यास त्याला लोक अदालतीसाठी नोटीस बजावली जाते. लोकअदालतीत त्याला दंडाची रक्कम भरावीच लागते, असे वाहतूक शाखेच्या अधिकाऱ्यांनी सांगितले.