महावितरणतर्फे विद्युत सुरक्षा सप्ताह

वर्धापन दिनानिमित्त विविध स्पर्धांचे आयोजन

सकाळ वृत्तसेवा
कणकवली, ता. ३० ः महावितरणच्या वर्धापन दिनाच्या निमित्ताने ‘शून्य अपघात महावितरण, शून्य अपघात महाराष्ट्र’ ही संकल्पना घेऊन १ ते ६ जूनदरम्यान राज्यात विद्युत सुरक्षा सप्ताहाचे आयोजन केले आहे. या निमित्ताने आयोजित विद्युत सुरक्षा सप्ताहादरम्यान मॅरेथॉन, रॅली, निबंध व चित्रकला स्पर्धा आयोजित करण्यात येणार आहे. ग्राहकांना सुरक्षाविषयक ई-मेल व एसएमएस पाठविणे, भित्तीपत्रके, चित्रफिती अशा विविध माध्यमांद्वारे विद्युत सुरक्षेविषयी मोठ्या प्रमाणात जनजागृती करण्यात येणार आहे.
विद्युत अपघाताचे प्रमाण कमी करण्यासाठी महावितरणने विद्युत सुरक्षा सप्ताह आयोजित करून व्यापक जनजागृती कार्यक्रम हाती घेतला आहे. ‘आम्ही सुरक्षेचे शिल्पकार शून्य अपघाताने करू महावितरणचे ध्येय साकार’ हे ब्रिद घेऊन महावितरणच्या सर्व क्षेत्रीय कार्यालयांत १ ते ६ जूनदरम्यान विद्युत सुरक्षा सप्ताहात विविध कार्यक्रम होणार आहेत. रविवारी १ जूनरोजी सर्व परिमंडळ कार्यालयांच्या मुख्यालयाच्या शहरात मॅरेथॉन ‘रन फॉर सेफ्टी’ आयोजित करण्यात येणार आहे. तसेच विद्यार्थी, ग्राहक व जनमित्र यांच्यासाठी विद्युत सुरक्षा प्रश्नमंजुषा जाहीर केली आहे. सहभागी होणाऱ्यांना ऑनलाईन प्रमाणपत्र देण्यात येणार आहे. महावितरण कार्यालय, रोहित्र पेटी, आर. एम. यु., डिजिटल बोर्ड, शिडी गाडी, उपकेंद्र, तक्रार निवारण केंद्र, ग्राहक सुविधा केंद्र, रहिवासी परिसर अशा ठिकाणी विद्युत सुरक्षा पोस्टर्स लावण्यात येणार असून, विद्युत सुरक्षाविषयी जनजागृती करण्यात येणार आहे.
--------
इतरही उपक्रमांचे आयोजन
सोमवार, २ जून रोजी राज्यातील ६५० उपविभागअंतर्गत शहर व ग्रामीण भागातील रहिवासी परिसरात विद्युत सुरक्षाविषयी जनजागृती करण्यात येईल. मंगळवारी ३ आणि ४ जून रोजी कर्मचाऱ्यांच्या पाल्यांसाठी आणि कुटुंबीयांसाठी तसेच विद्यार्थ्यांसाठी विद्युत सुरक्षाविषयी निबंध, चित्रकला स्पर्धा, महावितरण कर्मचारी आणि अधिकाऱ्यांसाठी विद्युत सुरक्षाविषयी निबंध स्पर्धा आयोजित केली आहे. ५ जून वसुंधरा दिनी १५० विभागीय स्तरावर विद्युत सुरक्षा व वीज बचतविषयी रॅली काढण्यात येणार आहे. ६ जून रोजी सकाळी १० ते १०.१५ या वेळेत राज्यातील सर्व शाखा कार्यालयातील जनमित्र यांच्यासाठी विद्युत सुरक्षा प्रतिज्ञा कार्यक्रम घेण्यात येणार आहे.