निवे बुद्रुकमध्ये
हातभट्टीवर कारवाई
रत्नागिरी ः निवे बुद्रुक (ता. संगमेश्वर) येथे विनापरवाना गावठी हातभट्टीवर पोलिसांनी कारवाई केली. या कारवाईत ५८० रुपयांची पाच लिटर दारू जप्त केली. देवरूख पोलिसांत संशयिताविरुद्ध गुन्हा दाखल केला आहे. प्रसन्ना दत्ताराम सुर्वे (वय ४४, रा. निवे बुद्रुक सरोदेवाडी, ता. संगमेश्वर) असे संशयिताचे नाव आहे. निवे बुद्रुक सरोदेवाडी येथे पोलिसांनी केलेल्या कारवाईत संशयिताकडे विनापरवाना हातभट्टीची ५८० रुपयांची पाच लिटर गावठी दारू सापडली. या प्रकरणी पोलिस कॉन्स्टेबल अरविंद जमदाडे यांनी देवरूख पोलिसांत तक्रार दिली.
-----------
जोशी पाळंद येथील
वृद्धेचा मृत्यू
रत्नागिरी ः हृदयविकाराच्या आजाराने चार वर्षे आजारी असलेली वृद्ध महिला तोल जाऊन पडली. तिच्या डोक्याला दुखापत झाली. उपचारासाठी जिल्हा शासकीय रुग्णालयात दाखल केले असता तेथील वैद्यकीय अधिकाऱ्यांनी तपासून मृत घोषित केले. अंजली गंगाधर लिंगायत (वय ७०, रा. लक्ष्मीप्रसाद अपार्टमेंट, जोशी-पाळंद, रत्नागिरी) असे मृत वृद्ध महिलेचे नाव आहे. ही घटना रविवारी (ता. २०) सायंकाळी पावणेपाचच्या सुमारास जिल्हा शासकीय रुग्णालयात घडली.
-----------
चक्कर आलेल्या
महिलेचा मृत्यू
रत्नागिरी ः कोदवली (ता. राजापूर) येथील महिलेला अचानक चक्कर आली. तिला उपचारासाठी राजापूर ग्रामीण रुग्णालय येथे दाखल केले. तेथील वैद्यकीय अधिकाऱ्यांनी तिला तपासून मृत घोषित केले. अर्पिता जितेंद्र गुरव (वय ४३, रा. कोदवली-गुरववाडी, ता. राजापूर) असे मृत महिलेचे नाव आहे. ही घटना रविवारी (ता. २०) सायंकाळी साडेपाच ते सहाच्या सुमारास ग्रामीण रुग्णालय-राजापूर येथे घडली. राजापूर पोलिसांत आकस्मिक मृत्यूची नोंद केली आहे.
---------