संस्कृत सप्ताहानिमित्त
योग प्रमाणपत्र अभ्यासक्रम
रत्नागिरी : कविकुलगुरु कालिदास संस्कृत विश्वविद्यालय रामटेकचे भारतरत्न डॉ. पांडुरंग वामन काणे संस्कृत अध्ययन केंद्र, रत्नागिरी उपकेंद्र आणि यांच्यावतीने संस्कृत सप्ताहानिमित्त १ ते १५ ऑगस्ट दरम्यान दररोज सायंकाळी ५.३० वाजता निःशुल्क योग प्रमाणपत्र अभ्यासक्रम आयोजित केला आहे. हा अभ्यासक्रम भारतरत्न डॉ. पांडुरंग वामन काणे संस्कृत अध्ययन केंद्र येथे घेण्यात येणार असून, यामध्ये सहभाग घेणाऱ्या विद्यार्थ्यांना प्रमाणपत्र दिले जाणार आहे. प्रा. अक्षय माळी यांच्याशी संपर्क साधावा, असे आवाहन केले आहे. हा अभ्यासक्रम सर्वांसाठी खुला व विनामूल्य असून, योगामध्ये रस असणाऱ्या विशेषतः महिलांनी याचा लाभ घ्यावा, असे आवाहन उपकेंद्राचे संचालक डॉ. दिनकर मराठे यांनी केले आहे.
-----
संरक्षण समितीची
२८ ला बैठक
रत्नागिरी : माजी सैनिकांच्या कुटुंबीयांना संरक्षण देण्यासाठी जिल्हास्तरीय संरक्षण समितीची मासिक बैठक पोलिस अधीक्षकांच्या अध्यक्षतेखाली २५ जुलैला आयोजित केली होती. काही अपरिहार्य कारणास्तव बैठक रद्द केली आहे. ही बैठक आता २८ जुलैला दुपारी १ वाजता पोलिस अधीक्षक कार्यालयात होणार आहे. ज्या माजी सैनिकांना कौटुंबिक संरक्षण संदर्भात तक्रारी असल्यास बैठकीस आपला अर्ज व संबंधित कागदपत्रासह विहीत वेळेत उपस्थित रहावे, असे आवाहन जिल्हा सैनिक कल्याण अधिकारी यांनी केले आहे.
-----
पोलिस भरतीपूर्व
प्रशिक्षण केंद्र उद्घाटन
गुहागर ः जिजाऊ शैक्षणिक व सामाजिक संस्था यांच्या वतीने गुहागर येथे मोफत पोलिस भरतीपूर्व प्रशिक्षण केंद्र व स्पर्धा परीक्षा वाचनालय याचा उद्घाटन सोहळा झाला. मोफत पोलिस भरतीपूर्व प्रशिक्षण केंद्र व स्पर्धा परीक्षा वाचनालयाचे कार्यालय देवपाठ बाजारपेठ, दापोली अर्बन बँकेशेजारी सुरू केले आहे. या कार्यालयाचे उद्घाटन जिजाऊ शैक्षणिक आणि सामाजिक संस्थेचे संस्थापक नीलेश भगवान सांबरे यांच्या हस्ते करण्यात आले. यावेळी सदगुरू आलोकनाथजी महाराज (मठाधिपती, श्री क्षेत्र भोगवती नगर, तानसा), अॅड. प्रसाद जांगळे यांच्यासह जिजाऊ शैक्षणिक व सामाजिक संस्था महाराष्ट्र संस्थेचे पदाधिकारी उपस्थित होते. अॅड. प्रसाद जांगळे यांच्या हस्ते मार्गदर्शन पुस्तिका देऊन नीलेश सांबरे यांचा सत्कार करण्यात आला.
----------