कार्यकर्त्यांनो संघटना बळकट करा ः घाणेकर
संगमेश्वर, ता. २८ ः शिवसेना उद्धव बाळासाहेब ठाकरे शिवसेनेतर्फे नावडी पंचायत समिती गणात महाराष्ट्राचे माजी मुख्यमंत्री व पक्षप्रमुख उद्धव बाळासाहेब ठाकरे यांच्या वाढदिवसानिमित्त आयोजित कार्यक्रमात उपतालुकाप्रमुख प्रकाश घाणेकर यांनी कार्यकर्त्यांना संघटना बळकट करण्यासाठी कानमंत्र दिला.
गावमळा येथे झालेल्या कार्यक्रमाला शिवसेना पदाधिकारी, महिला आघाडी व शिवसैनिक उपस्थित होते. या प्रसंगी आगामी जिल्हा परिषद, पंचायत समिती व ग्रामपंचायत निवडणुकांसाठी सज्ज राहण्याचे आवाहन घाणेकर यांनी केले. ते म्हणाले, आजही सच्चा शिवसैनिक कोणत्याही आमिषाला न लागता उद्धव ठाकरे यांच्या पाठीशी ठाम उभा आहे. या कार्यक्रमात महिला उपतालुकाप्रमुख मनीषा बने व विभागप्रमुखांनी मनोगत व्यक्त करत कार्यकर्त्यांना मार्गदर्शन केले. कार्यक्रमाचे सूत्रसंचालन माजी सरपंच अनिषा नागवेकर यांनी केले.