swt412.jpg
22074
देवगड : तालुक्यात आंबा झाडावर कणी दिसून येत आहे.

आंब्यावर अवकाळीची ‘फोडणी’ पडणार का?
उकाड्याची झळ; काजू, कोकमवरही संकट येण्याची भीती
सकाळ वृत्तसेवा
देवगड, ता. ४ ः जिल्ह्याच्या किनारी भागात अचानक उकाड्यात वाढ झाली आहे. गारवा नाहीसा होऊन वातावरणातील उष्णतेत वाढ झाली आहे. त्यामुळे संभाव्य पावसाची लक्षणे मानली जात असून अवकाळी पाऊस झाल्यास आंबा, काजू तसेच अन्य फळ पिकांना धोका पोहोचू शकतो, असे मत बागायतदार व्यक्त करीत आहेत. आधीच आंबा उत्पादन घटलेले असताना त्यावर अवकाळीची ''फोडणी'' पडू नये, अशी अपेक्षा बागायतदार शेतकरी करीत आहेत.
गेले काही दिवस बदलत्या वातावरणाचा स्थानिक अनुभव घेत आहेत. मध्यंतरी पुन्हा थंडीचा जोर वाढला होता. किनारी भागात बोचरा वारा सुटला होता. त्यामुळे हवेत चांगलाच गारठा पसरला होता. आता पुन्हा थंडी गायब होऊन वातावरणातील उष्णतेत वाढ झाल्याने पाऊस कोसळण्याची भीती व्यक्त केली जात आहे. अवकाळी पाऊस झाल्यास आंबा, काजू, कोकम तसेच अन्य पीक अडचणीत येण्याची बागायतदारांना भीती आहे. राज्याच्या काही भागात अवकाळी पावसाने हजेरी लावल्याने किनारी भागात अवकाळी पाऊस झाल्यास नुकसानीचे ठरू शकते, असे मत आंबा बागायतदार व्यक्त करीत आहेत.
यंदा आंबा पीक सुरुवातीपासूनच अडचणीत असल्याने आता अवकाळी पाऊस झाल्यास नुकसानीची तीव्रता वाढू शकते, असेही सांगितले जात आहे.