PAK vs NZ, T20 World Cup2021: पाकिस्तानच्या क्रिकेट संघाने टीम इंडियापाठोपाठ न्यूझीलंडलाही पराभूत केले. दोन सलग विजयांसह पाकिस्तानचा संघ ४ गुणांसह तालिकेत अव्वलस्थान पोहोचला. प्रथम फलंदाजी करत न्यूझीलंडच्या संघाने १३४ धावा केल्या होत्या. या धावांचा पाठलाग करताना पाकिस्तानची अवस्था ५ बाद ८७ अशी होती. तेथून पुढे अनुभवी शोएब मलिक आणि असिफ अली यांनी दमदार फटकेबाजी करत संघाला विजय मिळवून दिला. या सामन्यात पाकचा विजय झाला असला तरी न्यूझीलंडच्या डेवॉन कॉनवेचा कॅच विशेष गाजला.

१३५ धावांच्या आव्हानाचा पाठलाग करताना कर्णधार बाबर आझम ९ धावांवर आणि फखर झमान ११ धावांवर बाद झाला. त्यानंतर मोहम्मद रिझवान आणि मोहम्मद हाफीज हे दोघे खेळत होते. हाफीजने धावगती वाढवण्याच्या नादात एका हवाई फटका खेळला. पण डेवॉन कॉनवे सीमारेषेवर फिल्डिंग करत होता. कॉनवेने धावत जाऊन अत्यंत चपळाईने तो झेल टिपला. कॅच घेताना तो अक्षरश: हवेत होता. त्याने झकास झेल टिपत हाफीजला ११ धावांवर माघारी धाडले.

पाहा व्हिडीओ-

दरम्यान, न्यूझीलंडकडून डॅरल मिचेल आणि डेवॉन कॉनवे या दोघांनी प्रत्येकी २७ धावा केल्या. तर केन विल्यमसनने २५ धावा केल्या. या व्यतिरिक्त इतर खेळाडूंना फारशी चांगली कामगिरी करता आली नाही. या आव्हानाचा पाठलाग करताना पाकिस्तानचा सलामीवीर रिझवान सर्वाधिक ३३ धावांची खेळी करून गेला. त्यानंतर सहाव्या विकेटसाठी शोएब मलिक (२६*) आणि असिफ अली (२७*) या दोघांनी नाबाद ४८ धावा करत पाकिस्तानला विजय मिळवून दिला.