India vs England : भारत आणि बांगलादेश यांच्यातील खेळपट्ट्यांचे स्वरूप आणि हवामान जवळपास समान असणार, त्यामुळे भारतात खेळण्याचा अनुभव पुढील वर्षी बांगलादेशमध्ये होणाऱ्या टी-२० विश्वकरंडक स्पर्धेसाठी उपयुक्त ठरू शकेल, असे मत इंग्लंडची कर्णधार हेथर नाईट हिने व्यक्त केले.

भारताविरुद्ध आजपासून सुरू होणाऱ्या ट्वेन्टी-20 मालिकेच्या पार्श्वभूमीवर हेथर नाईट पत्रकार परिषदेत बोलत होती. भारतात याअगोदरही मी खेळलेले आहे. खेळाडू म्हणून आपले कौशल्य येथे पणास लागते. हवामान आणि प्रेक्षकांचा आवाज यांचे आव्हान सांभाळत खेळणे सोपे नसते, असे हेथर म्हणाली.

खरे तर आपण किती प्रगती केली आहे आणि नवोदित खेळाडू किती तयार आहे याची चाचणी घेण्यासाठी भारतासारखे दुसरे ठिकाण नाही. २०२४ मध्ये बांगलादेशमध्ये टी-२० विश्वकरंडक स्पर्धा होणार आहे, त्यामुळे येथील अनुभव आणि तयारी फार मोलाची ठरेल, असे हेथरने सांगितले.

भारताविरुद्धचे आमचे काही टी-२० सामने फारच चुरशीचे झालेले आहेत. भारताकडे काही चांगल्या विख्यात खेळाडू आहेत आणि त्यांचा त्यांच्या मायदेशात सामना करणे सोपे नसणार आहे, असे सांगताना हेथरने प्रेक्षकांचा भारतीय संघाला मिळणाऱ्या आवाजी पाठिंब्याचा उल्लेख केला. असाच उल्लेख ऑस्ट्रेलियाचा कर्णधार पॅट कमिन्सने विश्वकरंडक जिंकल्यानंतर केला होता.