Sunil Gavaskar on Hardik Pandya IPL 2024 MI vs CSK : चेन्नई सुपर किंग्जकडून पराभूत झाल्यानंतर मुंबई इंडियन्सचा कर्णधार हार्दिक पांड्याला मोठ्या टीकेला सामोरे जावे लागले आहे. या सामन्यात हार्दिकची कामगिरीही काही खास नव्हती. शेवटच्या षटकात एमएस धोनीने चेन्नईसाठी 500 च्या स्ट्राइक रेटने धावा केल्या आणि हार्दिक पांड्याच्या षटकात फक्त 4 चेंडूत 20 धावा ठोकल्या. यादरम्यान भारताच्या माजी दिग्गज सुनील गावसकरने हार्दिकची खराब कामगिरी आणि कर्णधारपदावर संताप व्यक्त केला आहे.

सुनील गावसकर म्हणाले की, “कदाचित बऱ्याच दिवसांनी मी अशी वाईट गोलंदाजी पाहिली आहे. ज्या चेंडूंवर धोनी षटकार मारणार होता तेच चेंडू हार्दिकने टाकले. एक षटकार सुद्धा ठीक आहे, पण पुढच्या चेंडूवर तुम्ही लेन्थ बॉल टाकला, तरीही तुम्हाला माहित आहे की फलंदाज लेन्थ बॉलची वाट पाहत आहे. ही पूर्णपणे सामान्य गोलंदाजी होती. आणि सामान्य कर्णधार.

मुंबई इंडियन्सविरुद्ध चेन्नई सुपर किंग्जचा माजी कर्णधार महेंद्रसिंग धोनीने 4 चेंडूत सलग तीन षटकार आणि 2 धावा करत 20 धावा केल्या. आश्चर्याची गोष्ट म्हणजे मुंबईने 6 विकेट्सवर 186 धावा केल्या आणि चेन्नईने 20 धावांनी सामना जिंकला. महेंद्रसिंग धोनीने या 20 धावा केल्या नसत्या तर कदाचित निकाल वेगळा लागला असता. ऋतुराज गायकवाड आणि शिवम दुबे यांनी चेन्नई सुपर किंग्ज संघाला 180 धावांच्या पुढे नेले पण महेंद्रसिंग धोनीच्या षटकारामुळे धावसंख्या 200 च्या पुढे गेली.

सामन्याबद्दल बोलायचे झाले तर, चेन्नईने 20 षटकात 6 गडी गमावून 206 धावा केल्या. कर्णधार गायकवाडने 69 तर शिवम दुबेने 66 धावा केल्या. प्रत्युत्तरात मुंबईचा संघ 6 गडी गमावून केवळ 186 धावा करू शकला. रोहित शर्माने 63 चेंडूत नाबाद 105 धावा केल्या. पण तो संघाला विजय मिळवून देऊ शकला नाही.