अंबी (पुणे) : महाराष्ट्र - आसाम यांच्यामधील रणजी करंडकातील ब गटातील येथे पार पडलेली लढत अखेर अनिर्णित राहिली. केदार जाधवच्या २८३ धावांच्या जोरावर महाराष्ट्राने पहिल्या डावात ३२० धावांची मोठी आघाडी मिळवली; पण आसामचा दुसरा डाव लवकर बाद करण्यात त्यांना अपयश आले.

रिषव दासच्या नाबाद ११४ धावांच्या खेळीमुळे आसामने दुसऱ्या डावात ६ बाद ३०९ धावा फटकावल्या. महाराष्ट्राने पहिल्या डावातील आघाडीच्या जोरावर तीन गुणांची कमाई केली. आसामने एक गुण मिळवला.

आसामला पहिल्या डावात २७४ धावांपर्यंत मजल मारता आली. त्यानंतर महाराष्ट्राने पहिल्या डावात ९ बाद ५९४ धावा करून डाव घोषित केला. केदार जाधवने २८३ धावांची खेळी हे महाराष्ट्राच्या डावाचे वैशिष्ट्य ठरले. सिद्धेश वीरने १०६ धावांची खेळी करीत महाराष्ट्राच्या धावसंख्येत मोलाची भर घातली.

संक्षिप्त धावफलक ः आसाम - पहिला डाव सर्व बाद २७४ धावा आणि दुसरा डाव ६ बाद ३०९ धावा (कुणाल सायकिया ५२, राहुल हजारीका ३९, रिषव दास नाबाद ११४, सिद्धार्थ सारमाह ५३, सत्यजीत बच्छाव ३/१२८, सिद्धेश वीर ३/७९) अनिर्णित वि. महाराष्ट्र - पहिला डाव ९ बाद ५९४ धावा, डाव घोषित.

रिषव दासचे दमदार शतक

महाराष्ट्राला पहिल्या डावात ३२० धावांची आघाडी घेता आली. त्यामुळे लढतीच्या चौथ्या दिवशी महाराष्ट्राकडे विजयाची संधी होती. पण अखेरच्या दिवशी आसामने ६ बाद ३०९ धावा फटकावल्या. त्यामुळे ही लढत अनिर्णित राहिली.

रिषव दास याने २११ चेंडूंमध्ये १३ चौकार व २ षटकारांसह नाबाद ११४ धावांची खेळी साकारली. सिद्धार्थ सारमाहने ५३ धावा केल्या. महाराष्ट्राकडून सत्यजित बच्छाव व सिद्धेश वीर यांनी प्रत्येकी तीन फलंदाज बाद केले.