कोलकाता : बीसीसीआय अध्यक्ष सौरभ गांगुली (Sourav Ganguly) यांना कोरोनाची (Corona) लागण झाल्यानंतर त्यांना कोलकाता येथील वूडलँड्स रुग्णालयात दाखल करण्यात आले होते. ते व्याधीग्रस्त श्रेणी मोडत असल्याने त्यांच्या प्रकृतीची चाहत्यांना चिंता होती. या चाहत्यांसाठी आनंदाची बातमी आहे. सौरभ गांगुलीला आज रुग्णलयातून सुट्टी (Discharged) देण्यात आली आहे. पण, ते कोरोनाग्रस्त असल्याने त्यांना पुढचे दोन आठवडे गृह विलगीकरणात ठेवण्यात येणार आहे.

रुग्णालय प्रशासनाने पीटीआयला सांगितले की, 'आम्ही आज गागुंलीला रुग्णालयातून सुट्टी दिली आहे. त्यांना पुढचे दोन आठवडे घरातच डॉक्टरांच्या निगराणीखाली विलगीकरणात ठेवण्यात येणार आहे. त्यानंतर पुढे त्यांच्यावर कशा प्रकाराचे उपचार सुरु करायचे हे ठरवण्यात येईल.'

सौरभ गांगुली कोरोना पॉझिटिव्ह (Corona Positive Sourav Ganguly) झाल्यानंतर त्याला सोमवारी रात्री वूडलँड्स रुग्णालयात दाखल करण्यात आले होते. सौरभ गांगुलाला खबरदारीसाठी रुग्णालयात दाखल करण्यात आले होते. त्यांची प्रकृती स्थीर होती. गांगुलीला रुग्णालयात दाखल केल्यानंतर त्याच्यावर मोनोक्लॉनल अँटीबॉडी कॉक्टेल उपचार करण्यात आले होते.

सौरभ गांगुली या वर्षात दोन वेळा रुग्णालयात दाखल झाला होता. त्यांच्यावर दोनदा अँजियोप्लास्टी करण्यात आली होती. याचबरोबर सौरभ गांगुलीचा मोठा भाऊ स्नेहशील गांगुली देखील या वर्षाच्या सुरुवातीला कोरोना पॉझिटिव्ह झाला होता. (Corona Positive Sourav Ganguly Health Update)