Kolhapur Loksabha Election : राज्यातील सत्तांतराचे जिल्ह्यात उमटलेले पडसाद, त्यातून राष्ट्रवादी व शिवसेनेत पडलेली फूट, निवडून आणण्यापेक्षा एखाद्याची जिरवायलाच होणारे मतदान हा जिल्ह्याचा पूर्वेतिहास, विद्यमान खासदारांविषयी नाराजी आणि विकासाच्या मुद्द्यावर लोकसभेची कोल्हापूरची जागा राखण्याचे आव्हान महायुतीसमोर असेल.

कोल्हापूर लोकसभा मतदारसंघाचा इतिहास १९९९ पासून नेहमीच चर्चेत राहणारा आहे. देशात एक निकाल आणि या मतदारसंघात त्याच्या उलटा निकाल असेच समीकरण सातत्याने राहिलेले आहे. त्यामुळे यावेळीही कोण कोणाला निवडून आणणार, यापेक्षा कोण कोणाला पाडणार, याचीची उत्सुकता जास्त असेल. सद्य:स्थितीत ही जागा महायुतीत मुख्यमंत्री एकनाथ शिंदे (Eknath Shinde) यांच्या नेतृत्वाखालील शिवसेनेकडे आहे.

२०१९ च्या निवडणुकीत माजी मुख्यमंत्री उद्धव ठाकरे (Uddhav Thackeray) यांच्या नेतृत्वाखालील शिवसेनेतून विजयी झालेले खासदार प्रा. संजय मंडलिक यांनी श्री. शिंदे यांच्यासोबत जाण्याचा निर्णय घेतला. या जोरावर या जागेवर शिंदे गटाकडून हक्क सांगितला जात आहे. शिंदे गटाला ही जागा मिळाली, तर सद्य:स्थितीत त्यांच्याकडे प्रा. मंडलिक वगळता अन्य प्रबळ उमेदवार नाही. त्यांनीही लढण्यासाठी शड्डू ठोकला आहे. महाविकास आघाडीत ही जागा काँग्रेसला देऊन त्यावर श्रीमंत शाहू छत्रपती महाराज यांची उमेदवारी जवळ जवळ निश्‍चित मानली जात आहे.

दुसरीकडे हा मतदारसंघ आपल्याकडे घेऊन लढवण्यासाठी भाजपचे प्रयत्न सुरू असून, त्यांच्याकडून समरजितसिंह घाटगे यांना मैदानात उतरवण्यासाठी हालचाली सुरू आहेत. महाविकास आघाडीच्या एकूण वाटचालीची सूत्रे काँग्रेसचे जिल्हाध्यक्ष आमदार सतेज पाटील यांच्याकडेच राहणार आहेत. गेल्या निवडणुकीत राज्यात सर्वाधिक मताधिक्यांनी प्रा. मंडलिक निवडून आले.

त्या तुलनेत त्यांच्याकडून फारशा अपेक्षा पूर्ण झाल्या नाहीत. कोल्हापूरची जागा शिवसेनेलाच मिळणार व आपणच उमेदवार असणार, असे सांगत ‘गोकुळ’चे संचालक डॉ. चेतन नरके यांनी जिल्हाभर फलक लावले. त्यांचीही या निवडणुकीतील भूमिका महत्त्वाची असेल. काँग्रेसकडून इच्छुक असलेले बाजीराव खाडे असो किंवा राष्ट्रवादीकडून इच्छुक असलेले जिल्हाध्यक्ष व्ही. बी. पाटील, यांना पक्षाचे आदेश पाळावे लागणार आहेत.