Hatkanangle Loksabha : 'हातकणंगलेची जागा मी सहज जिंकू शकतो, पण..'; राजू शेट्टींनी उद्धव ठाकरेंकडे केली 'ही' मागणी

जयसिंगपूर : उद्धव बाळासाहेब ठाकरे यांच्या शिवसेनेने मला बाहेरून पाठिंबा द्यावा यासाठी मी पक्षाचे प्रमुख उद्धव ठाकरे यांची शनिवारी (ता. १६) मुंबईत भेट घेतली. मी त्यांच्या पाठिंब्यावर लढायला तयार आहे, पण त्यांचे ‘मशाल’ चिन्ह न घेता स्वाभिमानी पक्षातर्फेच लढेन, असे श्री. ठाकरे यांना सांगितले असल्याची माहिती स्वाभिमानी शेतकरी संघटनेचे प्रमुख राजू शेट्टी (Raju Shetti) यांनी दिली.

‘मला ठाकरे (Uddhav Thackeray) यांच्या शिवसेनेचा पाठिंबा हवा असला तरी विकास आघाडी पक्षाचा घटक नसल्याचे सांगत शेट्टी म्हणाले, ‘पाठिंब्याबाबत सकारात्मक बोलणी झाली आहे. हातकणंगलेची (Hatkanangle Constituency) जागा माझी पारंपरिक आहे. मी ही निवडणूक सहज जिंकू शकतो. अजून त्यांचेही जागा वाटप झाले नसल्याने अंतिम निर्णय झाला नसला तरी सकारात्मक निर्णयाची अपेक्षा आहे.

महाविकास आघाडीची अनेक धोरणे मला पटत नसल्याने महाविकास आघाडीचा (Mahavikas Aghadi) उमेदवार म्हणवून घेण्यात मला रस नाही. मी यापूर्वी २००४ पासून स्वाभिमानी पक्षावरच निवडणूक लढवली आहे. यामुळे ठाकरे यांच्या ‘मशाल’ चिन्हावर निवडणूक लढवण्याचा प्रश्नच येत नाही. हातकणंगले लोकसभा मतदारसंघ हे माझे होम पीच असून, मतदारसंघात मिळत असलेला प्रतिसाद लक्षात घेता उद्धव ठाकरे यांनी सहकार्याची भूमिका घ्यावी. शेतकरी आणि सर्वसामान्यांच्या हितासाठी येणाऱ्या काळात काम करणे सोयीचे होणार आहे.’