सातारा : लोकसभा (Satara Lok Sabha) निवडणुकीच्या तिसऱ्या टप्प्यातील मतदानाला सुरूवात झालीये. सातारा लोकसभा मतदारसंघात महायुतीचे उमेदवार खासदार उदयनराजे भोसले (Udayanraje Bhosale) आणि महाविकास आघाडीचे (शरद पवार गट) उमेदवार आमदार शशिकांत शिंदे यांच्यात हाय व्होल्टेज लढत होत आहे.

या प्रमुख लढतीकडं संपूर्ण राज्याचं लक्ष लागून राहिलंय. दरम्यान, उदयनराजे यांच्यासह त्यांच्या मातोश्री राजमाता कल्पनाराजे भोसले (Rajmata Kalpana Raje Bhosale), पत्नी दमयंतीराजे भोसले यांनी सकाळी ७ वाजून ७ मिनिटांनी अनंत इंग्लिश स्कूलमधील मतदान केंद्रावर जाऊन आपला मतदानाचा हक्क बजावला. आणि त्यांनी इतरांनाही मतदान करण्याचे आवाहन केले.

तत्पूर्वी सकाळी जलमंदिर पॅलेस येथे उदयनराजे भोसले यांनी भवानी मातेचे दर्शन घेतले. यानंतर त्यांच्या पत्नी दमयंतीराजे भोसले यांनी त्यांचे औक्षण केले. तद्नंतर साताऱ्यातील अनंत इंग्लिशस्कूल शाळेत जाऊन उदयनराजेंसह राजमाता कल्पनाराजे, दमयंतीराजे भोसले यांनी बरोबर सात वाजून सात मिनिटांनी मतदान केले.