मुंबई : महाराष्ट्र नवनिर्माण सेनेचे अध्यक्ष राज ठाकरे यांनी राष्ट्रवादी काँग्रेसचे अध्यक्ष शरद पवार यांची आज (बुधवार) भेट घेतली. ही भेट लोकसभा निवडणुकीच्या पार्श्वभूमीवर महत्त्वाची मानली जात आहे. या दोन्ही नेत्यांमध्ये सुमारे 20 मिनिटे चर्चा झाल्याची माहिती मिळत आहे. 

राज ठाकरे यांनी आगामी लोकसभा निवडणूक लढविणार नसल्याचे जाहीर केले. तसेच त्यांनी मोदींविरोधात लढायचे असे सांगत याचा फायदा ज्या पक्षाला व्हायचा त्यांना होऊ द्या, असे सांगितले होते. त्यांच्या या वक्तव्यानंतर आज त्यांनी शरद पवार यांची मुंबईतील निवासस्थानी भेट घेतली. या दोन्ही नेत्यांमध्ये काय चर्चा झाली याबाबतची माहिती अद्याप मिळू शकली नाही. मात्र, राज ठाकरे हे राष्ट्रवादी काँग्रेसला पाठिंबा देणार का, याबाबत राजकीय चर्चाँना उधाण आले आहे. 

दरम्यान, राज ठाकरे यांच्या भेटीपूर्वी भाजपचे बंडखोर आमदार अनिल गोटे यांनीही शरद पवार यांची त्यांच्या निवासस्थानी भेट घेतली.