मुंबईः राज्याचे उपमुख्यमंत्री तथा भारतीय जनता पक्षाचे महाराष्ट्रातले सर्वात मोठे नेते देवेंद्र फडणवीस यांच्याकडे तीन राज्यांची जबाबदारी देण्यात आलेली आहे. आगामी विधानसभा निवडणुकीच्या अनुषंगाने फडणवीस तीन दिवस तीन राज्यांमध्ये सभा, यात्रा करणार आहेत.

देवेंद्र फडणवीस हे चालू सप्टेंबर महिन्यामध्ये ५ ते ६ दिवस प्रचारासाठी राज्याबाहेर असणार आहेत. १२, १३, १४, १८ सप्टेंबर रोजी त्यांचा दौरा असेल. शिवाय २२ आणि २३ सप्टेंबर रोजीही ते इतर राज्यांच्या प्रचार दौऱ्यावर असतील.

१२ ते १४ सप्टेंबर दरम्यान, राजस्थानमध्ये फडणवीस पदयात्रा आणि जाहीर सभांना संबोधित करतील. १८ सप्टेंबर रोजी मध्य प्रदेश दौरा असेल तर २२ किंवा २३ रोजी ते छत्तीसगडच्या दौऱ्यावर जातील. मध्य प्रदेशमध्ये भाजपची जनसंवाद यात्रा सुरु आहे, त्यात फडणवीस सहभाग नोंदवतील.

मागे बिहारच्या प्रभारीपदाची जाबाबदारी देवेंद्र फडणवीसांकडे होती. तेव्हा त्यांनी सक्षमपणे नेतृत्व सिद्ध केलं होतं. तिथे सत्तास्थापन केली होती. शिवाय गोव्यातही त्यांनी चुणूक दाखवून दिलेली. आता राजस्थान, मध्य प्रदेश आणि छत्तीसगडमध्ये फडणवीसांचा प्रभाव दिसणार का? हे निवडणुकांनंतर स्पष्ट होईल.