पंढरपूर - नीरा नदीच्या पाण्यासाठी शेतकऱ्यांनी गुरुवारपासून (ता. १२) गणरायापुढे उपोषण सुरू केले आहे. जोपर्यंत नीरा कालव्यातून पाणी मिळत नाही तोपर्यंत गणपतीचे विसर्जन करणार नाही, या निर्णयावर येथील शेतकरी दुसऱ्या दिवशीही ठाम आहेत. गणेश विसर्जन न झाल्याने प्रशासनापुढे मोठा पेच निर्माण झाला आहे.

नीरा उजव्या कालव्यातून शेतीसाठी पाणी मिळावे या मागणीसाठी मागील काही दिवसांपासून पंढरपूर, सांगोला आणि माळशिरस तालुक्‍यात ठिकठिकाणी आंदोलने सुरू आहेत. सोलापूर जिल्ह्यात अद्याप पाऊस पडला नसल्याने शेतीचा आणि पिण्याच्या पाण्याचा प्रश्न गंभीर झाला आहे. एकीकडे भीमा आणि नीरा नदीला पूर आलेला असतानाच दुसरीकडे मात्र याच भागातील शेतकऱ्यांना पाण्यासाठी गणपती बाप्पासमोरच आंदोलन करण्याची वेळ आली आहे.

दरम्यान, पाटबंधारे विभागाने अद्याप पाणी सोडण्यासंदर्भात कोणतीच हालचाल न केल्याने येथील शेतकऱ्यांचे बाप्पासमोरचे उपोषण आज दुसऱ्या दिवशीही सुरूच आहे. यामुळे येथील गणेशमूर्तीचे विसर्जन अद्याप 
झालेले नाही.

जोपर्यंत पाणी मिळणार नाही तोपर्यंत आम्ही गावातील गणपतींचे विसर्जन करणार नाही.
- सचिन ताटे, शेतकरी