मुंबई - ‘एखाद्याच्या घरातला बालहट्ट मी कसा पुरवणार? बालहट्ट पुरवण्यासाठी पक्ष नसतो,’’ असा टोला राष्ट्रवादी काँग्रेसचे अध्यक्ष शरद पवार यांनी राधाकृष्ण विखे पाटील यांना आज लगावला. यशवंतराव चव्हाण प्रतिष्ठानमध्ये ते माध्यमांशी बोलत होते. 

सुजय विखे यांनी कोणत्या पक्षात जावे? राधाकृष्ण विखे यांनी काय करावे? हा त्यांचा व्यक्तिगत प्रश्‍न असल्याचे पवार म्हणाले. 

दरम्यान, राष्ट्रवादीच्या कोट्यातून राजू शेट्टी यांच्यासाठी एक जागा सोडली असून, काँग्रेसच्या संबंधातील चर्चा झाल्यानंतरच घोषणा होईल, असे सांगून पवार म्हणाले, ‘‘प्रकाश आंबेडकर व मनसे यांच्याशी आघाडीबाबत माझी कोणतीही चर्चा झालेली नाही.’’

माढा लोकसभेतून माघार घेतल्याबाबत बोलताना पवार म्हणाले, ‘‘निवडणूक लढवत नाही याचा आनंद आहे. मी १४ निवडणुका लढलो कधीही पराभव झाला नाही. मात्र माझ्याविरोधात वक्तव्य करणारे त्यांची पातळी दाखवून देतात,’’ या शब्दांत पवार यांनी फटकारले. 

घराण्यात वाद नाहीत
‘‘माढा मतदारसंघाविषयी अद्याप कोणताही निर्णय झालेला नाही. मी स्वतः मोहिते पाटलांना आग्रह केला की तुम्ही निवडणूक लढवा,’’ असे सांगितल्याचे पवार म्हणाले. ‘‘पवार घराण्यात कोणतेही वाद नाहीत, वाद निर्माण करणारे कधीही यशस्वी होणार नाहीत,’’ असेही पवार यांनी स्पष्ट केले.