नागपूर - अमेरिकेतील मिशिगन राज्यात मराठी भाषेला अधिकृत परदेशी भाषेचा (फॉरेन लॅंग्वेज) दर्जा प्राप्त झाला आहे. यामुळे २०१९ च्या शालेय वर्षापासून सर्व विद्यार्थी मराठी भाषा शाळेत शिकून त्याबद्दल ‘कॉलेज क्रेडिट’ मिळवू शकतील. मराठीला हा बहुमान मिळवून देणाऱ्या सौ. प्राची आठवले (जोशी) या मूळच्या नागपूरकर असून, २५ वर्षांपूर्वी त्या मिशिगनला स्थायिक झाल्या आहेत. 

मराठीसह अन्य भाषांना अधिकृत परदेशी भाषेचा दर्जा देण्याबाबतचे विधेयक मिशिगनच्या लोकप्रतिनिधी सभेत (हाऊस ऑफ रिप्रेझेंटेटिव्हज)  बहुमताने संमत झाले आहे. यासाठी आठवले यांनी घेतलेल्या प्रयत्नांवर बृहन्‌ महाराष्ट्र मंडळाच्या उत्तर अमेरिकेतील जानेवारी महिन्याच्या मासिकात सविस्तर दखल घेण्यात आली आहे. भास्कर दाणी यांनी यावर सविस्तर लेख लिहिला आहे.
अमेरिकेत बहुतांश राज्यांमध्ये कॉलेज प्रवेशासाठी इयत्ता नववी ते बारावीदरम्यान विद्यार्थ्यांना एक परदेशी भाषा शिकणे सक्तीचे असते.