मुंबई : शिवसेना भवनामध्ये (Shivsena Bhavan) काल संजय राऊतांनी घेतलेल्या पत्रकार परिषदेनंतर राज्यातील राजकीय वातावरण चांगलेच तापले आहे. राऊत यांच्या पत्रकार परिषदेत राऊत यांनी काल अतिशय शिवराळ भाषेत भाष्य केले होते. त्यांच्या या शब्दांबद्दल अनेक राजकीय नेत्यांनी तसेच सामन्य नागरिकांनी देखील टीका केली होती. दरम्यान, राऊत यांच्या या भाषेचा केंद्रीय मंत्री नारायण राणे यांनी देखील जोरदार समाचार घेतला आहे. राणे म्हणाले की, शिरवाळ भाषा वापरणे म्हणजे मर्दानगी नसल्याची खोचक टीका त्यांनी राऊतांवर केली आहे. ते मुंबईत पत्रकार परिषदेत बोलत होते. यावेळी त्यांनी राऊत यांनी घेतलेल्या पत्रकार परिषदेतील अनेक मुद्यांवर भाष्य केले. (Narayan Rane Slams Sanjay Raut)

राणे यांनी राऊत यांच्या परिषदेचा उपरोधिकपणे उल्लेख करत म्हटलंय की, काल आंतरराष्ट्रीय पत्रकार परिषदेला तुम्ही उपस्थित होतात. त्यामुळे त्या पत्रकार परिषदेला उत्तर म्हणा किंवा मित्र संजय राऊत यांची जी केविलवाणी परिस्थिती झाली होती आणि जो घाम फुटला होता, तो कशामुळे फुटला होता. विरोधकांनी फोडला होता की चुकीच्या कामांना घाबरुन घाम फुटला होता, ते सांगण्यासाठी ही पत्रकार परिषद मी घेत आहे. हा शिवसेना वाढवण्यासाठी नाहीये. याचं लक्ष उद्धव ठाकरे जिथे बसलेत, त्या खुर्चीवर आहे, असा खोचक टोलाही नारायण राणे यांनी लगावला आहे.