मुंबई- लोकसभा निवडणुकीत एकही उमेदवार रिंगणात उतरलेला नसताना राज्यभर सभा घेणारे मनसेचे अध्यक्ष राज ठाकरे यांना आता सभांचा खर्च दाखवणे भाग पडणार आहे. निवडणूक आयोगाने त्यांच्याकडे सभांच्या खर्चाचा तपशील मागवला आहे. राज्याचे अतिरिक्त मुख्य निवडणूक आयुक्त दिलीप शिंदे यांनी गुरुवारी (ता. २) पत्रकारांना ही माहिती दिली.

पंतप्रधान नरेंद्र मोदी आणि भाजपचे अध्यक्ष अमित शहा यांच्यावर राज यांनी प्रत्येक सभांमधून टीकेची झोड उठवली होती. एकही उमेदवार निवडणूक लढत नसताना राज यांनी सभा घेतल्या. त्यांच्या या सभांतून ‘लाव रे तो व्हिडीओ’ हे वाक्‍य लोकप्रिय झाले. एकही उमेदवार निवडणूक लढत नसताना त्यांच्या या सभांचा खर्च कुणाच्या खात्यात दाखवणार, असे प्रश्‍न भाजपचे प्रवक्ते विनोद तावडे यांनी उपस्थित केले होते. आता निवडणूक आयोगाने राज यांच्याकडे खर्चाचा तपशील मागवला आहे.