नाशिक : "किड्‌स झी' या खासगी शाळेमधील एका शिक्षिकेने साडेतीन वर्षांच्या चिमुकल्याला मारहाण केल्याचा धक्कादायक व्हिडिओ शनिवारी व्हायरल झाला. या घटनेच्या निषेधार्थ नागरिकांनी संतप्त प्रतिक्रिया व्यक्त केला. संबंधित शिक्षिकेला संस्थेने तातडीने कामावरून कमी केले आहे. 

"किड्‌स झी' या खासगी शाळेतील घटनेचे सीसीटीव्हीतील चित्रीकरण व्हायरल झाले. यामध्ये संबंधित शिक्षिका साडेतीन वर्षांच्या श्रेयस महेंद्र पवार असे नाव असलेल्या चिमुरड्याला अमानुष मारहाण करताना दिसत आहे. हा व्हिडिओ पाहताच शिक्षिकेविरोधात तक्रार देण्यासाठी गंगापूर पोलिस ठाण्यात गर्दी केली होती. पोलिसांनी संबंधित शिक्षिकेला, तसेच संस्थाचालकांना ठाण्यात बोलावून घेत समज दिली. या घटनेनंतर संस्थेनेही शिक्षिकेला तातडीने कामावरून काढून टाकल्याचे सांगितले. ही शाळा कायमची बंद करावी, अशी मागणी परिसरातील नागरिकांनी केली आहे. चार-पाच महिन्यांपूर्वी नाशिकच्या एका नामांकित शाळांमध्ये विद्यार्थ्यांच्या अंगावर वळ उठेपर्यंत मारल्याच्या प्रकार घडला होता.