अभिनेत्री अंकिता लोखंडेची (Ankita Lokhande) 'पवित्र रिश्ता' ही मालिका लवकरच एका नव्या रुपात प्रेक्षकांच्या भेटीला येणार आहे. याच मालिकेतून अंकिता घराघरात पोहोचली. तिने साकारलेल्या अर्चनाच्या भूमिकेने प्रेक्षकांची मनं जिंकली. दिवंगत अभिनेता सुशांत सिंह राजपूतसोबत (Sushant Singh Rajput) तिने पहिल्या मालिकेत काम केलं होतं. आता या नव्या मालिकेत सुशांतची जागा अभिनेता शाहीर शेखने (Shaheer Shaikh) घेतली आहे. नुकत्याच दिलेल्या एका मुलाखतीत अंकिता या मालिकेविषयी आणि तिच्या भूमिकेविषयी मोकळेपणे व्यक्त झाली.

आधीच्या मालिकेतील अर्चना आणि आताची अर्चना यांमधील फरकाबद्दल सांगताना ती म्हणाली, "मालिकेच्या या दुसऱ्या सिझनमध्ये काय नवीन असेल? तर अर्चना. तुम्ही तिला कॉलेजमध्ये जाताना पाहणार, ऑफिसला जाताना पाहणार. या अर्चनामध्ये बरेच बदल झाले असून ते प्रेक्षकांना नक्कीच आवडतील. ती आता त्यागाची देवी नाही राहिली. आता ती स्वत:साठी जगणार आहे. तिच्या या भूमिकेवरसुद्धा प्रेक्षक प्रेमाचा वर्षाव करतील, अशी मला खात्री आहे."

अंकिताने गेल्या वर्षी डिसेंबरमध्ये प्रियकर विकी जैन याच्याशी लग्नगाठ बांधली. या लग्नाविषयी ती पुढे म्हणाली, "लग्नानंतर माझ्यासाठी काहीच बदललं नाही. विकी आणि माझ्यात खूप चांगली मैत्री आहे. त्याने माझी खूप साथ दिली. पार्टी करण्यासाठी मी लग्न केलं. आम्ही सलग तीन दिवस पार्टीच करत होतो. आम्हाला फक्त पैसे उधळायचे होते."

अंकिता आणि विकी यांचा लग्नसोहळा थाटामाटात पार पडला. मुंबईतील एका पंचतारांकित हॉटेलमध्ये या लग्नसोहळ्याचं आयोजन करण्यात आलं होतं. कलाविश्वातील अनेक सेलिब्रिटींनी लग्नाला हजेरी लावली होती.