येत्या शुक्रवारी सर्वत्र प्रदर्शित; जगण्यासाठी उमेद निर्माण करणारे कथानक

पुणे - आजकालच्या धकाधकीचे व डिजिटल जीवन जगत असताना माणसातील एकटेपणा वाढत आहे. अशाच एकटेपणावर भाष्य करणारा आणि आपल्या नावातच एक वेगळेपणा असणारा "लॉस्ट अँड फाउंड‘ हा चित्रपट येत्या शुक्रवारी (ता. 29 जुलै) सिनेमागृहात झळकणार आहे.
 

अग्निहोत्र या गाजलेल्या मराठी मालिकेनंतर स्पृहा जोशी आणि सिद्धार्थ चांदेकर यांची जोडी रुपेरी पडद्यावर पाहायला मिळणार आहे. या चित्रपटाविषयी बोलताना सिद्धार्थ म्हणाला, ‘स्पृहा आणि मी पहिल्यांदाच जोडी म्हणून या चित्रपटात काम करत आहोत, अशाच चांगल्या विषयाची वाट मी पाहत होतो. आजकालच्या "फास्ट लाइफ‘मुळे व्यक्त व्हायला लोकांना वेळ नाही आणि व्यक्त व्हावं असं जवळचं माणूसही नाही, अशी परिस्थिती दिसते. प्रत्येकाला व्यक्त व्हायला लावणारा हा चित्रपट आहे.‘‘

अभिनेत्री आणि सुंदर कविता करणारी कवयित्री, लेखिका म्हणून आपली ओळख असलेली स्पृहा जोशी हिने या चित्रपटातील दोन श्रवणीय गाणीही लिहिली आहेत. याविषयी स्पृहा म्हणते, ‘खूपच वेगळी आणि फ्रेश अशी या चित्रपटाची कथा आहे. नाउमेद झालेल्यांना ही कथा नव्याने आयुष्य जगण्याची प्रेरणा व पॉझिटिव्हिटी देते. याच भूमिकेतील भावनिक धाग्यामुळे मला या चित्रपटातील गाणी लिहिणं सोपं गेलं.‘‘

अशा हटके चित्रपटाचे दिग्दर्शन ऋतुराज धालगडे याने केले आहे. या विषयी तो म्हणतो, ‘आज माणसांच्या गर्दीतही अनेक माणसं एकटी आहेत. आपल्या भावना समजून घेईल, असं त्यांना कोणीच नाही. हाच या कथेचा मूळ गाभा असून, यातूनच सुरू होतो तो गमावण्याचा आणि गवसण्याचा प्रवास. प्रत्येक जण या चित्रपटाशी समरस होईल याची मला खात्री आहे.‘‘

गोल्डन गेट मोशन पिक्‍चर प्रस्तुत आणि विनोद मालगेवार निर्मित, या कथेला योग्य तो न्याय देण्यासाठी सिद्धार्थ चांदेकर, स्पृहा जोशी, मंगेश देसाई आणि डॉ. मोहन आगाशे या कलाकारांबरोबर अजूनही काही दिग्गज कलाकार आपल्याला या चित्रपटाच्या कथानकात भेटतील. विशेष म्हणजे अभिनेत्री स्पृहा जोशी आणि डॉ. राहुल देशपांडे यांनी या चित्रपटाची श्रवणीय गाणी लिहिली असून, शुभांकर यांनी लयबद्ध संगीत दिलं आहे.