प्रसिद्ध मराठी अभिनेता आणि 'मी होणार सुपरस्टार' या शोचा परीक्षक अंकुश चौधरीला (Ankush Chaudhari) कोरोनाची लागण झाली आहे. अंकुशने ट्विट करत याविषयीची माहिती दिली. 'नमस्कार, माझ्या कोरोना चाचणीचा रिपोर्ट पॉझिटिव्ह आला आहे. डॉक्टरांच्या सल्ल्यानुसार उपचार सुरू आहेत आणि तुमचे आशीर्वाद आहेच. कोरोनावर मात करून पुन्हा त्याच जोशात आणि त्याच जोमात तुमच्यासमोर येईन', असं त्याने ट्विटरवर लिहिलं आहे. त्याचप्रमाणे अंकुशच्या संपर्कात आलेल्यांनी कोरोना चाचणी करून घ्यावी आणि काळजी घ्यावी अशी विनंतीदेखील त्याने केली आहे.

अंकुश सध्या क्वारंटाइनमध्ये राहत असून योग्य ती काळजी घेत आहे. अंकुशच्या या ट्विटवर अनेकांनी त्याला काळजी घेण्यास सांगितलं आहे. तो लवकरात लवकर बरा व्हावा यासाठी प्रार्थना करत असल्याचंही चाहत्यांनी लिहिलं आहे. याआधी प्रेम चोप्रा, डेलनाज इरानी, जॉन अब्राहम आणि त्याची पत्नी प्रिया, एकता कपूर, सुमोना चक्रवर्ती यांनाही कोरोनाची लागण झाली आहे. मुंबईसह राज्यात कोरोना रुग्णसंख्येत मोठी वाढ होत आहे.

मुंबईत बुधवारी दैनंदिन रुग्णवाढीचा उच्चांक नोंदविण्यात आला. दिवसभरात १५ हजार १६६ रुग्णांची नोंद झाली असून, बाधितांचं प्रमाण थेट २५ टक्क्यांवर गेलं. मुंबईत दुसऱ्या लाटेत सर्वाधिक म्हणजे ११ हजार १०० रुग्ण एका दिवसात आढळले होते. दुसऱ्या लाटेत हा उच्चांक गाठण्यास सुमारे अडीच महिन्यांचा कालावधी लागला होता. मात्र आता ओमायक्रॉनच्या प्रसारामुळे पंधरा दिवसांत दैनंदिन रुग्णसंख्येने १५ हजारांचा टप्पा ओलांडला. बुधवारी मुंबईत रुग्णालयात दाखल करण्यात आलेल्या रुग्णांची संख्याही एक हजाराच्या वर होती.