'साथ निभाना साथियाँ' saath nibhana saathiya या मालिकेत 'गोपी बहू'ची भूमिका साकारून अभिनेत्री देवोलिना भट्टाचार्जी Devoleena Bhattacharjee प्रेक्षकांच्या घराघरात पोहोचली. मालिका संपल्यानंतरही देवोलिना विविध कारणांमुळे सोशल मीडियावर सतत चर्चेत असते. आता देवोलिनाचा बेली डान्स व्हिडीओ सध्या सोशल मीडियावर तुफार व्हायरल होत आहे. मालिकेत साध्या, सोज्वळ 'गोपी बहू'ची भूमिका साकारलेल्या देवोलिनाचा बोल्ड अंदाज पाहून चाहतेसुद्धा थक्क झाले आहेत. तिच्या या व्हिडिओला आतापर्यंत ८० हजारांहून अधिक लाइक्स मिळाले आहेत. (saath nibhana saathiya fame devoleena bhattacharjee aka gopi bahu belly dance video viral)

या व्हिडीओत तिने एका इंग्रजी गाण्यावर बेली डान्स केला आहे. 'प्रॅक्टिस, प्रॅक्टिस, प्रॅक्टिस. मी या डान्स प्रकाराच्या प्रेमात पडलेय. पूर्ण डान्सचा व्हिडीओ पोस्ट करण्याइतपत मी अजून शिकले नाही. मात्र हा डान्स प्रकार मी सध्या शिकतेय', असं तिने कॅप्शनमध्ये लिहिलंय. 'मला विश्वास आहे की मी हा डान्स प्रकार लवकरच शिकेन आणि डान्सचा पूर्ण व्हिडीओ सोशल मीडियावर पोस्ट करेन', असंही तिने म्हटलंय. 'गोपी बहू'चा वेगळा अंदाज काही चाहत्यांना पसंत पडला आहे तर काहींनी तिला ट्रोलसुद्धा केलंय.

देवोलिनाने भरतनाट्यम या शास्त्रीय नृत्यप्रकाराचं प्रशिक्षण घेतलं आहे. २०१९ मध्ये ती 'बिग बॉस १३'मध्ये झळकली होती. 'साथ निभाना साथियाँ' या मालिकेच्या दुसऱ्या सिझनच्या प्रमोशनदरम्यानही ती प्रेक्षकांच्या भेटीला आली होती. अभिनय क्षेत्रात पदार्पण करण्यापूर्वी देवोलिना ही ज्वेलरी डिझाइनरची नोकरी करत होती. तिने 'डान्स इंडिया डान्स २' या रिअॅलिटी शोसाठी ऑडिशनसुद्धा दिलं होतं. मात्र २०१२ मध्ये तिने 'गोपी बहू'ची भूमिका साकारली आणि तिथून तिला तुफान प्रसिद्धी मिळाली.