कोरोना महामारीच्या संकटात आणि लॉकडाउनमध्ये गरीबांची, गरजूंची जमेल त्या प्रकारे मदत करणारा अभिनेता सोनू सूद Sonu Sood हा जणू 'देवदूत'च ठरला आहे. आता या सोनू सूदने एक नवीन व्यवसाय सुरू केला आहे. या व्यवसायाचं नाव आहे 'सूद की सुपरमार्केट'. सोनूने सोशल मीडियावर त्याचा मजेशीर व्हिडीओ पोस्ट केला आहे. या व्हिडीओमध्ये तो सायकलवरून ब्रेड आणि अंडी विकताना दिसतोय. (Sonu Sood sells bread and eggs on a bicycle Watch video)

या व्हिडीओमध्ये सोनूने पांढरा टी-शर्ट आणि निळ्या रंगाची जीन्स परिधान केली आहे. तो चालवत असलेल्या सायकलला पाव, ब्रेड, अंडी यांच्या पिशव्या लटकवेल्या आहेत. 'मोफत होम डिलिव्हरी, १० अंडी विकत घेणाऱ्यास एक ब्रेडचं पॅकेट मोफत', असं कॅप्शन त्याने या व्हिडीओला दिलं आहे. "कोण म्हणालं की मॉल बंद झाले? सर्वांत महत्त्वाचा आणि सर्वांत महागडं सुपरमार्केट आता तयार आहे. हे पहा, माझ्याकडे सर्वकाही आहे. प्रत्येकी सहा रुपयांची अंडी आहेत, ४० रुपयांचा ब्रेडचा पुडा आहे, छोट्या ब्रेडचा पुडा २२ रुपयांना आहे. सोबतच पाव, खारी, रस्क आणि खूप सारे चिप्ससुद्धा आहेत", असं तो या व्हिडीओत म्हणताना दिसतोय.

सोनूच्या या व्हिडीओला तब्बल १८ लाखांहून अधिक व्ह्यूज मिळाले आहेत. अनेकांनी कमेंट्स करत त्याच्यावर प्रेमाचा वर्षाव केला आहे. तर काहींनी त्याला आशीर्वादसुद्धा दिला आहे. लॉकडाउनच्या काळात सोनू सूदने अनेक गरजूंची मदत विविधप्रकारे केली. अनेकांना रुग्णालयात बेड्स उपलब्ध करून दिले तर काहींना उपचारासाठी आर्थिक मदत केली.