विहामांडवा (जि.औरंगाबाद) : रोजंदारीवर काम करणारे पैठण तालुक्यातील हिरडपुरी येथील मजूर म्हसू शिंदे यांची मुलगी राधिका ही जिद्द, चिकाटीच्या जोरावर पोलिस उपनिरीक्षक (PSI) झाल्याने तिचे सर्वत्र कौतुक होत आहे. राज्याचे महसूलमंत्री बाळासाहेब थोरात (Balasaheb Thorat) यांनी ही राधिकाचे कौतुक करत तिचा सत्कार केला. पैठण तालुक्यातील हिरडपुरी येथील रोजंदारीवर काम करणारे म्हसू शिंदे हे मजूर असून ते पोट भरण्यासाठी भटकंती करत समनापूर येथे काही वर्षांपासून राहात आहे. (Wage Labourer Daughter Radhika Shinde Become Police Sub Inspector)

त्यांना दोन मुली व मुलगा असून त्यांनी आपल्या मुली अंकुशनगर (ता. अंबड, जि.जालना) येथील शाळाबाह्य मुलींची शाळा असलेले कस्तुरबा गांधी बालिका विद्यालय (आश्रम शाळा) येथे पाचवीपर्यंत शिकवले. दहावीचे शिक्षण पूर्ण झाल्यावर राधिका शिंदे हिने औरंगाबाद येथील देवगिरी महाविद्यालयातून राज्यशास्त्र या विषयातून पदवी संपादन केली आहे.

महाराष्ट्र लोकसेवा आयोगामार्फत (MPSC) घेण्यात आलेल्या पोलिस उपनिरीक्षक परीक्षेत तिने यश संपादन केले आहे.