जालना - मुलींचा जन्मदर वाढविण्यासाठी शासन स्तरावरून सातत्याने प्रयत्न केले जात आहेत. याचाच भाग म्हणून बुधवारपासून (ता. दोन) जालन्यासह राज्यातील ३२ जिल्ह्यांत ‘बेटी बचाव, बेटी पढाव’ अभियानाच्या माध्यमातून जनजागृतीला सुरवात होत आहे. 

मराठवाड्यातील जालना, परभणी, लातूर, नांदेड आणि बीड या पाच जिल्ह्यांसह राज्यातील ३२ जिल्ह्यांचा या अभियानात समावेश आहे. रिजनल आऊटरिच ब्युरो, माहिती व प्रसारण मंत्रालय, महाराष्ट्र, गोवा क्षेत्र पुणे, महिला व बालविकास विभाग यांच्या वतीने हे अभियान राबविण्यात येत आहे.

६३० कार्यक्रमांचे आयोजन 
लोकांमध्ये जनजागृती व्हावी यासाठी अभियानांतर्गत दोन ते २५ जानेवारी २०१९ या कालावधीत ६३० कार्यक्रम राबविले जाणार आहेत. त्यात मुलगा-मुलीत भेदभाव करू नये, भ्रूणहत्या करू नये, मुलींच्या शिक्षणासाठी पालकांनी पुढाकार घ्यावा आदी विषयांवर बॅनर आणि विविध ठिकाणी व्याख्यानांच्या माध्यमातून जनजागृती केली जाणार आहे.

मुलींकडे पाहण्याचा दुय्यम दृष्टिकोन आणि शिक्षणाचा अभाव यामुळे हे अभियान ग्रामीण आणि शहरी भागात राबविणे गरजेचे आहे.
- डॉ. जितेंद्र पानपाटील, प्रबंधक, रिजनल आऊटरिच ब्युरो