बीड - मुख्यमंत्री उद्धव ठाकरेंसह महाविकास आघाडीच्या नेत्यांचे शेतकऱ्यांवरील प्रेम हे पुतणा मावशीचे असल्याचे उघड झाल्याचा टोला शिवसंग्रामचे अध्यक्ष आमदार विनायक मेटे यांनी लगावला. 

इकडे राज्यमंत्रीमंडळाचा विस्तार होत असतानाच विनायक मेटे यांनी सरकारवर चौफेर टोलेबाजी केली. परिसरातील वानगाव फाटा येथील साई कोटेक्‍स या जिनिंगवर सोमवारी (ता. 30) शासकीय कापूस खरेदीच्या शुभारंभ प्रसंगी श्री. मेटे बोलत होते. नारायणगडाचे मठाधिपती शिवाजी महाराज उपस्थित होते.

हेही वाचा- भाकरीचे पीठ संपले अन सुरेखाच्या आयुष्याचा दोरही तुटला! हृदयद्रावक...

मेटे म्हणाले, की अतिवृष्टीनंतर राज्यात फिरणारे उद्धव ठाकरे हेक्‍टरी 25 हजार रुपयांची मदत देऊ म्हणत होते. त्यांच्यासह कॉंग्रेस - राष्ट्रवादीचे नेते प्रचारात शेतकऱ्यांचा सातबारा कोरा करू, असे शेतकऱ्यांना आश्‍वासने देत होते. आता खुद्द ठाकरे महाविकास आघाडीचे मुख्यमंत्री झाल्यानंतर फसवी कर्जमाफी केली आहे. 25 हजार रुपयांच्या नुकसान भरपाईचे काय झाले, असा सवालही मेटे यांनी केला.

हेही वाचा - आता निर्णय धनंजय मुंडेंच्या हाती

श्री. मेटे म्हणाले, मागच्या वेळी महायुतीत असलेल्या शिवसेनेचे पक्षप्रमुख उद्धव ठाकरे हे शेतकऱ्यांना संपूर्ण कर्जमाफी करु, शेतकऱ्यांचा सातबारा कोरा करु, असे पाच वर्षे म्हणत राहीले. प्रचारात देखील त्यांचा हाच प्रमुख मुद्दा होता. राष्ट्रवादी व कॉंग्रेस हे पक्ष आणि त्यांचे नेते देखील बारमाही शेतकऱ्यांची संपूर्ण कर्जमाफी करणार अशीच आश्वासने देत होते.

हेही वाचा - बीडचा सह्याद्री देवराई प्रकल्प महाराष्ट्रात पथदर्शी ठरेल - सयाजी शिंदे

आता तिघांची महाविकास आघाडी सत्तेवर आल्यानंतर या नेत्यांनी शेतकऱ्यांची फसवणूक करणारी कर्जमाफी केल्याचा आरोप विनायक मेटे यांनी केला. या सरकारला शेतकऱ्यांच्या रोषाला सामोरे जावे लागेल, असेही श्री. मेटे म्हणाले.