औरंगाबाद - पर्यटकांचे शहरातील प्रमुख आकर्षण असलेल्या बीबी-का-मकबरा या ऐतिहासिक वास्तूची डागडुजी कधी सुरू होणार, हा प्रश्‍न आता पुन्हा विचारला जात आहे. केवळ आश्‍वासनांचे घोडे दामटणाऱ्या भारतीय पुरातत्त्व विभागाने महासंचालकांनी दिलेली मुदत उलटूनही अद्याप कामाला सुरवात केलेली नाही.

औरंगाबादेत येणारा पर्यटक बीबी-का-मकबऱ्याला भेट दिल्याशिवाय राहत नाही. मात्र, या ऐतिहासिक वास्तूचे पुरातत्त्व विभागाने चालवलेले हाल ‘सकाळ’ने वारंवार निदर्शनास आणून दिले तरीही त्यावर तत्त्परतेने काम होताना दिसत नाही. मकबऱ्याच्या भिंतींचा गिलावा अनेक ठिकाणी गळून पडत आहे. घुमटावर आणि कारंजांच्या हौदांमध्ये झाडे उगवली आहेत. घुमटाचे संगमरवरी दगड निखळत आहेत. बगीचातील पदपथांवर शहरातल्या रस्त्यांसारखेच खड्डे पडले आहेत.

मकबऱ्याची दुरवस्था पाहून संतापलेल्या भारतीय पुरातत्त्व सर्वेक्षणच्या महासंचालक उषा शर्मा यांनी डागडुजीच्या कामासाठी दिलेली मुदत कधीच उलटून गेली आहे; मात्र मिनारांना पाईप बांधून ठेवणाऱ्या पुरातत्त्व विभागाच्या अधिकाऱ्यांनी अजून निविदा प्रक्रियेतच दिरंगाई चालवली असल्याचे सूत्रांनी सांगितले. डागडुजीला लवकरच सुरवात होईल, असे सांगणाऱ्या अधीक्षकांनीही यावर नंतर काय कार्यवाही करणार, ते अजून गुलदस्त्यात ठेवले आहे. यावर पुरातत्त्वच्या अधिकाऱ्यांशी संपर्क साधला असता, त्यांनी निविदा प्रक्रिया सुरू असल्याचे सांगितले.