औरंगाबाद- शहरातील वाहतुकीची समस्या एकीकडे गंभीर असतानाच खासदार इम्तियाज जलील वाहतूक नियोजनासाठी शुक्रवारी (ता. एक) रस्त्यावर उतरले. त्यानंतर त्यांनी वाहतूक अधिकाऱ्यांना वाहतूक नियमन व कारवाईबाबत सूचना दिल्या. 

गत अनेक वर्षांपासून औरंगाबाद शहरातील रस्ता, पार्किंग, वाहतूक व्यवस्थेबाबत प्रश्‍न कायम आहेत. त्यासाठी प्रशासनाकडून वरवरचे प्रयत्न सुरू असल्याने समस्या अजूनही जटीलच आहे. त्यामुळेच खासदार इम्तियाज जलील यांनी शुक्रवारी रस्त्यावर उतरण्याचा निर्णय घेतला. शहरातील वाहतूक समस्या जाणून घेण्यासाठी त्यांनी विविध भागात पाहणी केली. यावेळी त्यांच्यासोबत वाहतुक विभागाचे सहायुक आयुक्त दिनेशकुमार कोल्हे, पोलिस निरीक्षक दादासाहेब सिनगारे होते.

जालना रस्त्यासोबतच जुन्या औरंगाबादेतही त्यांनी पाहणी केली. 
पंचायत समितीसमोरील चौकात अखंड दुभाजक तोडण्याची सूचना त्यांनी केली. तसेच शहागंज भाजी मंडईत पाहणी करून त्यांनी हातगाडीवर व्यवसाय करणाऱ्यांबाबत निर्णय लवकरच घेणार असल्याचे सांगितले. शहरात पार्किंगचे नियम तोडणाऱ्यांवर कारवाई करा अशा सूचनाही त्यांनी पोलिसांना दिल्या. तसेच शहरातील काही रिक्षा थांबे खासदार निधीतून बांधण्याची तयारीही त्यांनी दर्शविली आहे. वाहतूक समस्या सोडविण्यासाठी पुढील आठवड्यात वाहतूक विभाग, महापालिका आणि आरटीओ अधिकाऱ्यांसोबत बैठक घेणार असल्याचे खासदार इम्तियाज जलील यांनी यांनी सांगितले.