बीड : परळी येथील व्यापारी महादेव मुंडे यांचा २१ ऑक्टोबर २०२३ रोजी धारदार शस्त्राने निर्घृण खून करण्यात आला होता. या घटनेला दीड वर्षाचा कालावधी उलटून गेला असतानाही अद्याप एकाही आरोपीला अटक करण्यात आलेली नाही.

मात्र, काही दिवसांपासून या प्रकरणात नव्या घडामोडी घडत असून, तपासाला गती मिळण्याची चिन्हे आहेत. या प्रकरणात विजयसिंह ऊर्फ बाळा बांगर याचा जबाब नोंदविण्यात आला. सध्या या प्रकरणाचा तपास केजचे सहायक पोलिस अधीक्षक कमलेश मीना करत आहेत.

मीना या प्रकरणाचा टॉस करणारे पाचवे तपास अधिकारी आहेत. दीड वर्षापूर्वी परळी येथे ही खुनाची घटना घडली. संतोष देशमुख हत्या प्रकरणानंतर या प्रकरणाची चर्चा नव्याने सुरू झाली. राष्ट्रवादी काँग्रेस शरदचंद्र पवार पक्षाच्या कार्याध्यक्ष सुप्रिया सुळे, आमदार सुरेश धस यांनी हे प्रकरण लावून धरले.

त्यांच्या पत्नी ज्ञानेश्वरी मुंडे व इतर नातेवाइकांनी उपोषणदेखील केले होते. त्यांनी वाल्मीक कराड व त्याच्या रक्ताच्या नात्यातील व्यक्तींनीच महादेव मुंडे यांची हत्या केल्याचा आरोप केला आहे. या गंभीर आरोपांची दखल घेत महादेव मुंडे यांच्या पत्नी ज्ञानेश्वरी मुंडे यांनी बाळा बांगर याचा जबाब अधिकृतरीत्या नोंदविण्याची मागणी केली होती.

त्यानुसार केज येथे पोलिसांनी बाळा बांगर याची तब्बल सहा तास चौकशी करीत सविस्तर जबाब नोंदवून घेतला. या नव्या तपासामुळे महिनाभरापासून रखडलेल्या खून प्रकरणात आता गती येण्याची शक्यता आहे.