पाटोदा : मराठा आरक्षण मिळेपर्यंत मी डोक्यावर फेटा बांधणार नाही, असा पण केला होता. आता आरक्षण मिळाले असले, तरी लोकांच्या मनात आरक्षणासंदर्भात असंख्य प्रश्न आहेत. त्यामुळे सध्याच्या परिस्थितीवरून मला फेटा बांधायची इच्छा होत नाहीये, असे मत पंकजा मुंडे यांनी व्यक्त केले.

महासांगवी येथील संत मीराबाई आईसाहेब संस्थान येथे त्यांच्या पुण्यतिथीनिमित्त सुरू असलेल्या हरिनाम सप्ताहाची सांगता गुरुवारी झाली, त्यावेळी त्या बोलत होत्या. व्यासपीठावर आमदार सुरेश धस, आमदार बाळसाहेब आजबे व माजी आमदार भीमराव धोंडे यांची उपस्थिती होती.

पंकजा मुंडे म्हणाल्या की, ‘‘आज समाजा-समाजांमध्ये राजकारणाच्या हेतूसाठी भिंती उभारल्या गेल्या आहेत. जातीपातीची मुळं अगदी खोलवर रुजलीय, प्रत्येकाने आपापल्या जातीचे महापुरुषदेखील वाटून घेतले आहेत. जिल्ह्यातील गडांची महती खूप मोठी आहे. मात्र, हे गड राजकारणाचे फड होऊ नयेत, असा निश्चय मी केला आहे.’’ याप्रसंगी संस्थानच्या मठाधिपती महंत राधाताई महाराज यांचे काल्याचे कीर्तन झाले. दरम्यान, महाप्रसादाचेही आयोजन करण्यात आले होते. यावेळी भक्तांची मोठी मांदियाळी होती.