अंबाजोगाई (जि. बीड) - अल्पवयीन मुलीला गुंगीचे औषध देऊन तिच्यावर वारंवार अत्याचार केल्याच्या आरोपात एकास दोषी ठरवून येथील जिल्हा व सत्र न्यायाधीश एम. बी. पटवारी यांनी जन्मठेप व 60 हजार रुपये दंडाची शिक्षा सुनावली. हा निकाल सोमवारी (ता. दहा) सुनावण्यात आला. अत्याचाराची घटना परळी तालुक्‍यात घडली होती. 

याबाबत माहिती अशी, की 2012 मध्ये अल्पवयीन मुलगी सुटीनिमित्त गावाकडे गेली होती. त्या वेळी तिच्या नात्यातील भगवान अप्पासाहेब दळवी (तत्कालीन वय 32) हा पीडितेला पाण्यातून गुंगीचे औषध देत वारंवार तिच्यावर अत्याचार करत होता. कोणाला सांगितल्यास ठार मारण्याची धमकीही त्याने या मुलीला दिली होती. यानंतर पीडितेच्या पोटात त्रास होऊ लागल्याने तिला आजीने येथील उपचारासाठी स्वामी रामानंद तीर्थ रुग्णालयात दाखल केले. 

हेही वाचा - कोंबड्यांमध्ये खरंच कोरोना विषाणू आहे का? नॉनव्हेजवाल्यानो, वाचा...

तपासणीदरम्यान डॉक्‍टरांना संशय आल्याने त्यांनी पीडितेला विचारणा केली असता तिच्यावरील अत्याचाराला वाचा फुटली. पीडितेच्या फिर्यादीवरून आरोपी भगवान दळवी याच्यावर डिसेंबर 2016 मध्ये सिरसाळा पोलिस ठाण्यात बलात्कार आणि पोक्‍सो कायद्यान्वये गुन्हा दाखल करण्यात आला. या प्रकरणाचा तपास प्रारंभी तत्कालीन पोलिस उपनिरीक्षक एम. एल. जाधव यांनी केला. त्यानंतर उपविभागीय पोलिस अधिकारी विशाल आनंद यांनी तपास पूर्ण करून आरोपींविरुद्ध न्यायालयात दोषारोपपत्र सादर केले. 

हेही वाचा - तुमचा विवाह कधी झालाय...बघा जमतेय का काही...

या प्रकरणी न्यायालयात एकूण नऊ साक्षीदार तपासण्यात आले. दोन्ही बाजूंचे युक्तिवाद तपासल्यानंतर जिल्हा व सत्र न्यायाधीश एम.बी. पटवारी यांनी भगवान दळवी याला दोषी ठरवत बलात्काराच्या आरोपात जन्मठेप व इतर गुन्ह्यातही विविध शिक्षा सुनावत 60 हजार रुपये दंडाची शिक्षा सुनावली. या प्रकरणी सरकार पक्षाच्या वतीने सहायक सरकारी अभियोक्ता लक्ष्मण फड यांनी बाजू मांडली. त्यांना पैरवी अधिकारी गोविंद कदम, पोलिस कर्मचारी राहुल शेप व बी.एस.सोडगीर यांनी मदत केली.