बीड : महसूल प्रशासनातील दोन तलाठ्यांवर निलंबनाची कारवाई करण्यात आली. तलाठी महिलेने अनुदान यादी सदोष तयार केली तर एका तलाठ्याने वाळूबद्दल तक्रार करणाऱ्याला उद्धट उत्तर दिल्याचे कारण आहे. वैशाली गणेश आत्राम व सुरेश नाकाडे अशी जिल्हाधिकारी दीपा मुधोळ- मुंडे यांनी सेवेतून निलंबित केलेल्या तलाठ्यांची नावे आहेत.

तलाठी वैशाली आत्राम यांनी माजलगाव तालुक्यातील गोविंदवाडी येथील २०२२ मधील अतिवृष्टी अनुदानाच्या याद्या संतोष तयार करुन अनुदान वाटप केले. एकूण क्षेत्राच्या ५० टक्के अनुदान रक्कम देणे अपेक्षित असताना देखील त्यांनी त्यामध्ये कमी- जास्त क्षेत्र दाखवून काही शेतकऱ्यांना कमी तर काहींना जास्त रक्कम दर्शविली व त्याप्रमाणे अनुदान वाटप झाले. वैशाली आत्राम यांच्या विरुद्ध चौकशीसाठी समिती नियुक्त करण्यात आली होती.

यात वैशाली आत्राम यांनी नियमबाह्य यादी तयार केल्याचे समोर आले. तर, माजलगाव तालुक्यातील रिधोरी हद्दीत अवैध वाळू उपसा होत असल्याची तक्रार करणाऱ्या नामदेव गवते या तक्रारदाराला तलाठी सुरेश नाकाडे याने वाळू माफियाच्या डोक्यात दगड घालून खून कर असा सल्ला देत अश्लील भाषेत शिवीगाळ केली होती.