मुंबई - मुंबई आंतरराष्ट्रीय विमानतळावर एका ८० वर्षीय प्रवाशांचा इमिग्रेशन काऊंटरजवळ मृत्यू झाला. या प्रवाशाने पत्नीसोबत न्यूयॉर्क येथून एअर इंडियाच्या विमानात व्हिलचेअर पॅसेंजरच्या रूपात बुकिंग केली होती. परंतु त्यांना व्हिलचेअर मिळाली नाही. चालत गेल्यामुळे मृत्यू झाला. १२ फेब्रुवारीला विमानतळावर न्यूयॉर्कहून एअर इंडियाच्या विमानातून उतरल्यानंतर ही घटना घडली.

मृत ज्येष्ठ नागरिक हे अनिवासी भारतीय आणि अमेरिकेचे पासपोर्टधारक होते. त्यांनी व्हिलचेअरची सुविधा आधीपासून बुक केली होती. या जोडप्याने मुंबईत येण्यासाठी एअर इंडियाच्या फ्लाइट एआय-११६च्या इकॉनॉमी क्लासने प्रवास केला. हे विमान रविवारी न्यूयॉर्कमधून रवाना झाले होते.

या विमानामध्ये ३२ व्हिलचेअर प्रवासी होते. मात्र विमानतळावर केवळ १५ व्हिलचेअर उपलब्ध होत्या. व्हीलचेअर पुरविण्याची जबाबदारी संबंधित एअरलाईन्सची असते. विमानतळ प्राधिकरणाची नाही.

व्हिलचेअरचा तुटवडा असल्याने या जोडप्यासाठी केवळ व्हिलचेअर असिस्टंट तिथे आला. पत्नी त्या व्हिलचेअरवर बसली. तर हे ८० वर्षीय गृहस्थ त्यांच्यामागून चालू लागले. इमिग्रेशन एरियापर्यंत पोहोचवण्यासाठी ते सुमारे दीड किमी पायी चालले असतील. त्यानंतर ते जमिनीवर कोसळले. त्यांना विमानतळावरील वैद्यकीय कक्षात नेले. तिथून त्यांना नानावती रुग्णालयात नेण्यात आले. दरम्यान, त्यांचा मृत्यू झाला.

एअर इंडियाच्या प्रवक्त्याने सांगितले की, व्हिलचेअरच्या अधिक मागणीमुळे प्रवाशाला व्हिलचेअर असिस्टंट मिळेपर्यंत वाट पाहण्याची विनंती केली होती. मात्र त्यांनी पत्नीसोबत चालण्याचा पर्याय निवडला.

सहार पोलीस स्टेशनने या प्रकरणी अपघाती मृत्यूची नोंद (एडीआर) केली आहे. वरिष्ठ पीआय धनंजय सोनवणे यांनी सांगितले की, "मृत व्यक्तीचे नाव मनुभाई पटेल असे असून हृदयविकाराचा झटका आल्याने त्यांचा मृत्यु झाला.