डोंबिवली - कल्याणमधील आधारवाडी कारागृहात एका कैद्याकडे 15 मोबाईल सापडले होते. या प्रकरणात जेल प्रशासनाकडून ठोस कारवाई न केल्याने तपासाअंती आधारवाडी कारागृहाचे तत्कालीन अधीक्षक ए. एस. सदाफुले यांच्या विरोधात निलंबनाची कारवाई करण्यात आली आहे. या प्रकरणी पूढील तपास करण्यात येणार आहे. कैद्यांकडे मोबाईल सापडल्यानंतरही सदाफुले यांनी ठोस कारवाई केली नाही. त्यामुळे त्यांच्या विरोधात कारवाई केल्याचे सांगितले जात आहे.

कल्याणच्या आधारवाडी कारागृहात कैद्याकडे मोबाईल सापडण्याचा घटना अनेकदा घडल्या आहेत. कैदी आपले नातेवाईक, मित्र यांच्याशी संपर्क साधने, तसेच इतर कामाकरीता लपूनछपून मोबाईलचा वापर करतात. विशेष म्हणजे त्यांना हा मोबाईल कुठून आणि कसा पुरविला जातो याचा तपास मात्र पुढे होत नाही. कल्याणच्या आधारवाडी कारागृहात मोबाईल आणि अन्य वस्तू सापडल्यावर अनेक गुन्हे दाखल करण्यात आले. या गुन्ह्यांच्या तपासाचे पुढे काय झाले हे जेल प्रशासनाकडून सांगण्यात येत नाही.

असाच एक प्रकार मे जून मध्ये झाला होता. सर्च ऑपरेशनमध्ये कैद्याकडे 15 मोबाईल सापडले हाेते. मोबाईल सापडल्यावर जेल प्रशासनाकडून जी ठोस कारवाई व्हायला हवी होती, ती झाली नाही. या प्रकरणात विभागाकडून कल्याणचे तत्कालीन

कारागृह अधीक्षक अंकुश सदाफुले यांच्या विरोधात निलंबनाची कारवाई झाली आहे. त्यांच्या निलंबनानंतर पुढील चौकशी होणार आहे. मोबाईल सापडल्यानंतर ठोस कारवाई आणि योग्य ती कारवाई न केल्याचा ठपका ठेवत सदाफुले यांच्या विरोधात कारवाई करण्यात आली आहे. मोबाईल सापडल्यानंतर आत्ता कल्याणच्या खडकपाडा पोलिस ठाण्यात गुन्हा दाखल करण्यात आला आहे. अधीक्षकांच्या विरोधात कारवाई झाल्याने एकच खळबळ उडाली आहे.

या संदर्भात अंकुश सदाफुले यांच्याशी संपर्क साधला असता त्यांनी मला सेवेत बढती मिळणार होती, त्यापासून मला वंचित ठेवण्यासाठी कारवाई झाली आहे. माझी बदली झाल्यानंतर दहा पंधरा दिवसांनी ते मोबाईल मिळाले होते.

माझी अकोला येथे बदली झाल्यानंतर दुसऱ्या दिवशी झडती झाली होती त्यामध्ये काहीही आक्षेपार्ह आढळून आले नाही. दहा दिवसांनी ते माझ्यावर आरोप करतात ते शक्य नाही. हा माझ्यावर अन्याय आहे.