मुंबई : दहशतवादविरोधी पथकाने (एटीएस) ठाण्यातील शीळ फाटारोड येथे केलेल्या कारवाईत चरससह एका काश्मिरी तरूणाला अटक केली. त्याच्याकडून सुमारे दोन किलो चरस हस्तगत करण्यात आला आहे.

एक काश्मिरी तरूण अंमली पदार्थांच्या विक्रीसाठी येणार असल्याची माहिती एटीएसला मिळाली होती. त्यानुसार एटीएसने सोमवारी शिळफाटा रोड येथे सापळा रचला. त्यावेळी मोटरसायकलवरून एक संशयित तरुण तेथे आला. त्याला ताब्यात घेऊन त्याची झडती घेतली असता त्याच्याकडे एक किलो 800 ग्रॅम चरस सापडले. आरोपीच्या चौकशीत तो जम्मू काश्मीर येथील अनंतनाग जिल्ह्यातील पाहेलगाम तहशीलमधील रहिवासी असल्याचे समोर आले. त्यानुसार अंमली पदार्थ तस्करी प्रतिबंधक कायद्यांतर्गत आरोपीविरोधात गुन्हा दाखल करण्यात आला आहे.

दरम्यान, आरोपीला ठाण्यातील न्यायालयापुढे हजर केले असता त्याला 10 दिवसांची पोलिस कोठडी सुनावण्यात आली आहे. अंमली पदार्थांच्या विक्रीचे पैसे दहशतवादी कारवायांसाठी वापरण्यात येत होते का, याबाबत एटीएस तपास करत आहे.