मुंबई : राज्यातील सत्तासंघर्षावर आज सुप्रीम कोर्टानं निकाल जाहीर केला. यातील सर्व महत्वाच्या मुद्दांचं विश्लेषण उपमुख्यंत्री देवेंद्र फडणवीस यांनी मुख्यमंत्र्यांसोबत घेतलेल्या पत्रकार परिषदेत केलं. फडणवीस काय म्हणालेत वाचा सविस्तर

फडणवीस म्हणाले, "सुप्रीम कोर्टाच्या या निकालावर आम्ही पूर्ण समाधान व्यक्त करतो. लोकशाहीचा आणि लोकमताचा पूर्णपण विजय झाला आहे. हा जो काही निकाल आहे त्यातील चार पाच जे महत्वाचे मुद्दे आहेत. त्यांपैकी पहिल्यांदा महाविकास आघाडीच्या मनसुब्यावर पूर्णपणे पाणी फेरलं आहे. कारण उद्धव ठाकरेंना पुन्हा मुख्यमंत्री बनवता येणार नाही.

दुसरं त्यांनी स्पष्टपणे हे सांगितलं आहे की, अपात्रतेचा सर्व अधिकार अध्यक्षांचा आहे. अध्यक्षच त्यावर निर्णय घेतील. सुप्रीम कोर्टात यात हस्तक्षेपास नकार दिला आहे. ज्या आमदारांविरोधात खटला दाखल आहे त्यांना सध्या पूर्ण अधिकार आहेत, असंही कोर्टानं म्हटलं आहे. तसेच जे काही सभागृहाचं कामकाज चालेल त्यामध्ये अपात्रेचा काहीही परिणाम होणार नाही. तसेच निवडणूक आयोगाला पूर्ण अधिकार आहेत हे देखील कोर्टानं म्हटलं आहे. आयोग स्वतंत्रपणे यावर निर्णय घेऊ शकतो. त्यामुळं आयोगाच्या निर्णयावर उद्धव ठाकरे गटाकडून जे दावे करण्यात आले होते ते पूर्णपणे चुकीचं असल्याचं सिद्ध झालं आहे.

तसेच दहाव्या सुचीनुसार राजकीय पक्ष कुठला? हे ठरवण्याचे अधिकार देखील विधानसभा अध्यक्षांना देण्यात आले आहेत. त्यामुळं याही बाबतीत स्पष्टपणे अधिकार अध्यक्षांना देण्यात आले आहेत. त्यामुळं हे सरकार पूर्णपणे संविधानिक बनलं आहे, अशा निकालातील विविध मुद्द्यांचं विश्लेषण फडणवीसांनी केलं आहे.