मुंबई : मध्य रेल्वेवर मंकी हिल ते कर्जत स्थानकांदरम्यान तांत्रिक कामांसाठी ‘अप’ मार्गावर गुरुवारपासून (ता. २४) १० दिवसांचा ब्लॉक घेण्यात येईल. त्यामुळे मुंबई-पुणे प्रगती एक्‍स्प्रेस रद्द करण्यात आली असून, मुंबई-कोल्हापूर कोयना एक्‍स्प्रेस पुण्यापर्यंतच धावणार आहे. काही गाड्यांच्या मार्गांत बदल करण्यात आला आहे. 

ब्लॉकदरम्यान २४, २५, २६, २७, ३१ ऑक्‍टोबर आणि १ नोव्हेंबरला सीएसएमटी-पंढरपूर-सीएसएमटी एक्‍स्प्रेस रद्द करण्यात येईल. सीएसएमटी-बिजापूर-सीएसएमटी एक्‍स्प्रेस, सीएसएमटी-पुणे-सीएसएमटी प्रगती एक्‍स्प्रेस आणि पनवेल-पुणे-पनवेल पॅसेंजर या गाड्या ३१ ऑक्‍टोबरपर्यंत रद्द करण्यात आल्या आहेत. 

भुसावळ-पुणे-भुसावळ एक्‍स्प्रेस ३१ ऑक्‍टोबरपर्यंत दौंड-मनमाडमार्गे धावणार आहे. सीएसएमटी-कोल्हापूर-सीएसएमटी कोयना एक्‍स्प्रेस, हुबळी-एलटीटी-हुबळी एक्‍स्प्रेस, हैदराबाद -सीएसएमटी-हैदराबाद एक्‍स्प्रेस, विशाखापट्टणम-एलटीटी-विशाखापट्टणम एक्‍स्प्रेस, नांदेड-पनवेल-नांदेड एक्‍स्प्रेस आणि पनवेल-नांदेड-पनवेल एक्‍स्प्रेस या गाड्या ३१ ऑक्‍टोबरपर्यंत पुण्यापर्यंतच चालवण्यात येतील. प्रवाशांनी या बदलांची नोंद घ्यावी, असे आवाहन मध्य रेल्वेने केले आहे.