मुंबई : मुंबई विद्यापीठ पीएच.डी. प्रवेश परीक्षा (पेट) प्रथमच ऑनलाईन घेत आहे. या पेट परीक्षा 16 डिसेंबरला घेण्यात येणार आहे. ऑनलाईन प्रवेश परीक्षेचे अर्ज 6 ते 23 नोव्हेंबरपर्यंत भरता येणार आहेत. 

विद्यापीठ अनुदान आयोगाच्या 2016 च्या निर्देशानुसार विद्यापीठाने पीएच.डी. व एमफील प्रवेशाच्या संदर्भात कुलगुरूंचे निर्देश प्रसिद्ध केले होते. या आधारावर 2018 ची पीएच.डी. व एमफील प्रवेशासाठी प्रवेश परीक्षा घेण्यात येणार आहे. या परीक्षेचे अर्ज फक्त ऑनलाईन असतील. विद्यार्थ्यांना त्याची कोणतीही प्रत विद्यापीठात जमा करण्याची आवश्‍यकता नाही; परंतु अर्जाची प्रत पुढील संदर्भासाठी काढून ठेवावी. या परीक्षेचे अर्ज भरताना कोणतेही कागदपत्र सादर करण्याची आवश्‍यकता नाही. विद्यार्थ्यांनी प्रवेश पात्रता पाहूनच प्रवेश अर्ज भरणे आवश्‍यक आहे. 

ही परीक्षा 4 विद्याशाखांमधून 78 विषयामध्ये घेतली जाणार आहे. संबंधित पेट परीक्षेचे प्रवेशपत्र 10 डिसेंबरपासून उपलब्ध होतील. ऑनलाईन अर्ज उमेदवारांना विद्यापीठाच्या www.mu.ac.in या संकेतस्थळावर 6 नोव्हेंबरपासून उपलब्ध असणार आहेत. ही परीक्षा ऑनलाईन आहे. संशोधन पद्धती व विद्यार्थ्यांचा पदव्युत्तर अभ्यासक्रमाच्या विषयावर आधारित असणार आहे.