मुंबई : पंजाब महाराष्ट्र कोऑपरेटीव्ह (पीएमसी) बॅंकेतील गैरव्यवहारप्रकरणी अटक करण्यात आलेला बॅंकेचा माजी व्यवस्थापकीय संचालक जॉय थॉमस याला गुरुवारी न्यायालयाने 14 दिवसांची पोलिस कोठडी सुनावली असून त्याची रवानगी आर्थररोड तुरुंगात करण्यात आली आहे. बुधवारी अटक करण्यात आलेल्या माजी संचालक सुरजित सिंग अरोरा याला पाच दिवस पोलिस कोठडी सुनावण्यात आली. 

सुरजित सिंग याची हा गेल्या 10 वर्षांपासून "पीएमसी'मध्ये संचालक होता. गैरव्यवहार झालेल्या 44 बॅंक खात्यांऐवजी कमी ठेवी असलेल्या 20 हजार 149 खात्यांमध्ये हे व्यवहार झाल्याचे दाखवण्यात आले. या 44 खात्यांपैकी 10 खाती एचडीआयएल ग्रुपच्या राकेशकुमार वाधवा यांची असल्याचे तक्रारीत म्हटले आहे. 31 ऑगस्ट 2019 नुसार या खात्यावरून दोन हजार आठ कोटी रुपये शिल्लक आहेत. बॅंकेत 4,355 कोटी रुपयांचा गैरव्यवहार झाल्याची तक्रार रिझर्व्ह बॅंकेने नेमलेल्या प्रशासकाने आर्थिक गुन्हे शाखेकडे (ईओडब्ल्यू) केली होती. त्यानंतर बॅंकेच्या व्यवस्थापनातील थॉमस यांच्या जबाबाच्या आधारावर वित्त कर्ज देताना काही अनिमितता असल्याचे उघड झाले होते. ही अनिमितता 2008 नंतरची असल्याचे दिसून आल्यामुळे तेव्हापासूनचे पुरावे गोळा करण्याचे मोठे आव्हान "ईओडब्ल्यू'समोर आहे. 

रिझर्व्ह बॅंकेच्या प्रशासकाने याप्रकरणी केलेल्या तक्रारीनंतर भांडुप पोलिस ठाण्यात फसवणुकीसह विविध गुन्हे दाखल करण्यात आले आहेत. त्यानंतर हा गुन्हा आर्थिक गुन्हे शाखेच्या बॅंकिंग दोन कक्षाला वर्ग करण्यात आला होता. सध्या याप्रकरणी विशेष तपास पथक तपास करत आहे.