मुंबई : जुहू-वर्सोवा मार्गावरील मॅनहोलचे झाकण चोरीला गेले असून महापालिकेने अज्ञात व्यक्तींविरोधात पोलिस ठाण्यात गुन्हा दाखल केला आहे. रिक्षातून आलेल्या काही व्यक्तींनी झाकण चोरले असल्याची शक्‍यता असून तसे महापालिकेने पोलिस तक्रारीत नमूद केले आहे. आजपर्यंत मुंबईत अनेक मॅनहोलची झाकणे चोरीला गेली आहेत. गर्दुल्ले वा भुरटे चोर झाकणे चोरून भंगारात विकत असतात. पण प्रथमच एका रिक्षातून येऊन नियोजनपद्धतीने झाकणाची चोरी झाल्याचे उघड झाले आहे. तक्रारीत रिक्षाचा क्रमांक देण्यात आल्याने चोर सापडण्याची शक्‍यता आहे.

जुहू-वर्सोवा जोडरस्त्यावरील विनीत टॉवरसमोरील दुभाजका-जवळील मॅनहोलचे झाकण शनिवारी मध्यरात्री चोरीला गेले. सोसायटीच्या सुरक्षा रक्षकाने सारा प्रकार बघितल्यानंतर दुसऱ्या दिवशी सकाळी रहिवाशांना त्याबाबत माहिती दिली. रहिवाशांनी महापालिकेच्या प्रभाग कार्यालयात त्याची कल्पना दिली. त्यानंतर प्रभागातील दुय्यम अभियंता रमेश गिरगावकर आणि सचिन माने यांनी प्रत्यक्ष येऊन खात्री केली. सुरक्षा रक्षकांनी दिलेल्या माहितीनुसार ‘एमएच ४७ डी ०७९५’ क्रमाकांच्या रिक्षातून तिघे जण आले होते. त्यांनी झाकण चोरले, अशी तक्रार पालिकेने वर्सोवा पोलिस ठाण्यात तक्रार दाखल केली.

मॅनहोलचे लोखंडी झाकण सुमारे २० हजाराचे  होते, अशी माहिती पालिकेने तक्रारीत नमूद केली आहे.

का होते झाकणांची चोरी?
मुंबईत पालिकेचे सुमारे ५६ हजार मॅनहोल आहेत. पूर्वी सर्व मॅनहोलना लोखंडी झाकणे होती. गर्दुल्ले आणि भुरटे चोर झाकणे चोरून भंगारात विकत असल्याने किमान दहा वर्षांपूर्वी महापालिकेने भंगारात किंमत नसलेली विशिष्ट फायबरची झाकणे बसवण्यास सुरुवात केली. मात्र तीही चोरीला जाऊ लागली. महापालिकेने आतापर्यंत अनेक वेळा पोलिसात तक्रार दाखल केली होती; मात्र कोणतेही पुरावे नसल्याने चोरांना पकडणे शक्‍य नव्हते.