बेस्ट कामगारांचा ६ ऑगस्टला मोर्चा
सकाळ वृत्तसेवा
मुंबई, ता. ११ : बेस्ट उपक्रमात सेवा करून १ ऑगस्ट २०२२नंतर सेवानिवृत्त झालेल्या ४,५०० हून अधिक कर्मचाऱ्यांना ग्रॅच्युइटी व इतर देणी तातडीने देण्यात यावी, या मागणीसाठी येत्या ६ ऑगस्ट रोजी दादर येथील वीर हुतात्मा भाई कोतवाल उद्यान येथून बेस्ट वडाळा आगारपर्यंत बेस्ट उपक्रमाच्या सेवेतून निवृत्त झालेल्या आणि बेस्ट उपक्रमात कार्यरत असलेल्या कर्मचाऱ्यांचा मोर्चा काढण्याचा निर्धार बेस्ट वर्कर्स युनिटचे नेते शशांक राव यांनी व्यक्त केला आहे.

कामगारांना उपदान प्रदान अधिनियम, १९७२ आणि बेस्ट वर्कर्स युनियनबरोबर झालेल्या कराराचे उल्लंघन करून १ ऑगस्ट, २०२२ नंतर निवृत्त झालेल्या ४,५०० हून अधिक सेवानिवृत्त बेस्ट कर्मचाऱ्यांना ग्रॅच्युइटी व इतर देणी युनियनने वारंवार पत्रव्यवहार करून तसेच निवेदने देऊन देणी अद्याप ही बेस्ट उपक्रमाकडून देण्यात आलेली नाहीत. यासाठी बेस्टच्या सेवेतून निवृत्त झालेल्या तसेच बेस्ट उपक्रमात कार्यरत असलेल्या कर्मचाऱ्यांची सभा आज डॉ. शिरोडकर हॉल, परळ येथे पार पडली. या सभेत सेवानिवृत्त झालेले तसेच सेवेत कार्यरत असलेले बेस्ट कर्मचारी मोठ्या संख्येने उपस्थित होते. या सभेत बेस्ट प्रशासनाने सेवानिवृत्त झालेल्या कामगारांना त्यांची ग्रॅच्युइटीची रक्कम तत्काळ द्यावी आणि जे कर्मचारी भविष्यात बेस्टच्या सेवेतून सेवानिवृत्त होणार आहेत, त्यांना सेवानिवृत्तीची देय असलेली रक्कम तातडीने मिळावी, याकरिता त्याचे नियोजन बेस्ट प्रशासनाने करावे, या मागणीसाठी येत्या ६ ऑगस्टचा मोर्चा असेल, असे शशांक राव यांनी सांगितले.