कुटुंब नियोजनाला मुंबईकरांचा उत्स्फूर्त प्रतिसाद
तीन वर्षांमध्ये ३४ हजार ८०५ नसबंदी शस्त्रक्रिया यशस्वी

सकाळ वृत्तसेवा
मुंबई, ता. २१ : मुंबई महापालिकेच्या सार्वजनिक आरोग्य विभागाच्या माध्यमातून केंद्र शासनाच्या कुटुंब कल्याण कार्यक्रम अंतर्गत गेल्या तीन वर्षांच्या (२०२२-२३ ते २०२४-२५) कालावधीत पुरुष आणि स्त्री नसबंदी मिळून एकूण ३४ हजार ८०५ शस्त्रक्रिया यशस्वीपणे करण्यात आल्या आहेत. यावरून कुटुंब नियोजनाला मुंबईकरांचा उत्स्फूर्त प्रतिसाद मिळाल्याचे दिसून येते. कुटुंब कल्याण कार्यक्रम अंतर्गत नागरिकांना नि:शुल्क पद्धतीने सेवा पुरविल्या जातात. कुटुंब नियोजन शस्त्रक्रिया अंतर्गत स्त्री, पुरुष नसबंदी शस्त्रक्रिया, तांबी बसविणे, गर्भनिरोधक गोळी (स्त्रियांच्या वापरासाठी), प्रचलित संतती प्रतिबंधक (निरोध), अंतरा इंजेक्टेबल गर्भनिरोधक आदी साधनांचे वाटप करण्यात येते. जागतिक लोकसंख्यादिन ११ जुलै रोजी साजरा करण्यात आला. त्या पार्श्‍वभूमीवर पालिकेचा हा अहवाल नुकताच जाहीर करण्यात आला.

मुंबई महापालिका कुटुंब कल्याण अहवाल (२०२२-२०२५)
एकूण नसबंदी शस्त्रक्रिया (तीन वर्षांत)
पुरुष नसबंदी १,४६७
स्त्री नसबंदी ३३,३३८
एकूण शस्त्रक्रिया ३४,८०५

इतर कुटुंब नियोजन सेवा वितरण
सेवा लाभार्थी
‘अंतरा’ इंजेक्शन १०,१७५ महिला
तांबी (कॉपर टी) ६१,३५३ महिला
निरोध (कंडोम) ३२,०७० पुरुष
गर्भनिरोधक गोळ्या ५६,००० महिला