वृद्धेसह वैमानिकाची १० कोटींना सायबर फसवणूक

मुंबई, ता. २१ : पश्चिम उपनगरात राहणाऱ्या वृद्धेसह एअर इंडियाच्या वैमानिकाची शेअर ट्रेडिंगच्या निमित्ताने तब्बल १० कोटी रुपयांना फसवणूक झाल्याची माहिती उघड झाली. या दोन्ही प्रकरणांत सायबर पोलिसांनी (पश्चिम विभाग) शनिवारी (ता. १९) गुन्हा नोंदवून तपास सुरू केला आहे.

पहिल्या प्रकरणात वांद्रे येथे पतीसोबत राहणाऱ्या वृद्धेला गेल्या महिन्यात अनोळखी व्यक्तीने व्हॉट्सॲपद्वारे शेअर बाजारातील गुंतवणुकीचे प्रलोभन दाखवित गुंतवणूक क्षेत्रात नामांकित कंपनीचे अधिकारी असल्याचे भासविले. या वृद्धेस एका व्हॉट्सॲप समूहात सहभागी करून घेण्यात आले. त्यावर येणारी माहिती अचूक असल्याने वृद्धेचा या व्यक्तींवर विश्वास बसला आणि अवघ्या एका महिन्यात या वृद्धेने विविध बँक खात्यांवर ७.८ कोटी रुपये भरले. त्यानंतर संबंधित ॲपवर बाजारातील मंदी आणि अस्थिरतेमुळे तोटा झाल्याचे दिसत होते. त्यामुळे या वृद्धेने गुंतवणुकीतील साडेसहा कोटी काढून घेण्याचा प्रयत्न केला असता, तिला आणखी १० टक्के रक्कम भरण्यास सांगण्यात आले. तेव्हा या वृद्धेच्या मनात शंकेची पाल चुकचुकली आणि केलेल्या पडताळणीत फसवणूक झाल्याचे तिच्या लक्षात आले. याच पद्धतीने अंधेरी येथे राहणाऱ्या आणि नामांकित विमान कंपनीत वैमानिक असलेल्या ५६ वर्षीय व्यक्तीस सव्वातीन कोटींचा गंडा घालण्यात आला. सायबर भामट्यांनी जून आणि जुलैमध्ये सव्वातीन कोटींची गुंतवणूक करून घेतली. या गुंतवणुकीवर १५ कोटी रुपये इतका नफा झाल्याचे ॲपवर दिसत होते. ही रक्कम काढून घेताना मात्र त्यालाही १० टक्के रक्कम भरण्यास सांगण्यात आले.