रस्त्यावरील बेघर महिलांना ‘लाडकी बहीण’ योजनेत समाविष्ट करण्याची मागणी
सकाळ वृत्तसेवा
मुंबई, ता. ११ : जागतिक बेघर दिनानिमित्त रस्त्यावरील आणि उघड्यावर राहणाऱ्या बेघर महिलांना ‘लाडकी बहीण’ योजनेचा लाभ देण्याची मागणी सीपीडी संस्थेचे समन्वयक जगदीश पाटणकर यांनी केली. रस्त्याकडेला किंवा सिग्नलजवळ फुगे, फळे, पुस्तके विकून उदरनिर्वाह करणाऱ्या भटके आणि विमुक्त समाजातील अनेक महिला कोणत्याही शासकीय कागदपत्रांशिवाय आहेत. त्यामुळे त्यांना शासनाच्या योजनांचा लाभ मिळत नाही. काही जणींकडे आता कागदपत्रांची पूर्तता झाली असली तरी त्या अजूनही ‘लाडकी बहीण’ योजनेपासून वंचित आहेत, असे पाटणकर यांनी सांगितले. जागतिक बेघर दिनानिमित्त सीपीडी संस्थेने महिला व बालकल्याण मंत्री आदिती तटकरे आणि मुख्यमंत्री कार्यालयाला निवेदन देऊन या महिलांना ‘लाडकी बहीण’ योजनेत समाविष्ट करण्याची मागणी केली आहे. याचबरोबर या समाजासाठी मुंबई महापालिकेने तयार केलेल्या ‘सर्वांसाठी पाणी’ या धोरणांतर्गत पिण्याच्या पाण्याचा लाभ मिळावा, अशी मागणीही करण्यात आली. तसेच महापालिकेच्या नियोजन विभागामार्फत या रस्त्यावरील महिलांच्या आर्थिक सक्षमीकरणासाठी बचत गट योजनांचा लाभ देण्याची मागणी संस्थेने केली आहे. दरम्यान, जागतिक बेघर दिनानिमित्त बोरिवलीतील चिकूवाडी येथील श्रमिक वस्तीत सीपीडी संस्थेच्या वतीने ई-श्रम कार्ड व आयुष्मान कार्ड नोंदणी शिबिर आयोजित करण्यात आले. या उपक्रमाबाबत सुनीता गाडे आणि योगेश बोले यांनी माहिती दिली.
.........