फार्मसीच्या ४२ महाविद्यालयांतील प्रवेशबंदी हटवली

मुंबई, ता. ११ ः फार्मसी कौन्सिल ऑफ इंडियाने (पीसीआय) आखून दिलेल्या मानांकन आणि नियम डावलणाऱ्या राज्यातील ७१ पदव‍िका आणि १८ पदवीच्या फार्मसी (औषधनिर्माणशास्त्र) महाविद्यालयांत यंदाच्या २०२५-२६ या शैक्षणिक वर्षांत आठवड्यापूर्वी प्रथम वर्ष प्रवेशाला बंदी घातली हाेती. त्यातील ४२ महाविद्यालयांतील ही बंदी उठवण्यात आली आहे.

प्रवेशबंदी उठवण्यात आलेल्या महाविद्यालयांत आठ बी. फार्मसी आणि उर्वरित ३४ डी. फार्मसी महाविद्यालयांचा समावेश आहे. यातील बहुतांश महाविद्यालयांनी आपल्याकडील विविध प्रकारच्या त्रुटी मागील राज्य तंत्रशिक्षण संचालनालयाकडे मागील आठवड्यात पूर्ण केल्याची माहिती आणि त्याचे पुरावे सादर केले होते. त्या पार्श्वभूमीवर उच्च व तंत्रशिक्षणमंत्री चंद्रकांत पाटील यांच्या पुढाकाराने त्याची माहिती तत्काळ पीसीआयकडे सादर केली होती. त्यानंतर या संस्थांतील फार्मसी प्रवेशाची बंदी उठवण्यात आली. त्यामुळे आता प्रवेशबंदी उठवलेल्या फार्मसी महाविद्यालयांत सीईटी सेलमार्फत तिसऱ्या प्रवेश फेरीत प्रवेश होणार असल्याची माहिती उच्च व तंत्रशिक्षण विभागाने दिली.

दरम्यान, प्रवेशबंदी घातलेल्या काही महाविद्यालयांनी न्यायालयात धाव घेतली होती. न्यायालयाने त्यांची बाजू ऐकून घेऊन त्यांना प्रवेश करण्याची मुभा देण्याचे आदेश दिले होते. त्यात केवळ काही महाविद्यालयांचा समावेश होता; मात्र पीएसआयने दिलेल्या आदेशामुळे इतरही महाविद्यालयांत प्रवेश होण्याचा मार्ग मोकळा झाला आहे.