वाशी, ता. १२ (बातमीदार) ः ठाणे-बेलापूर मार्गावर मोठा गवगवा करत नवी मुंबई महापालिकेने ई-टॉयलेटची संकल्पना राबवली आहे. मात्र, या मार्गावरील ई-टॉयलेट परिसरात रात्रीच्या वेळी तृतीयपंथीयांचा वावर वाढल्याने वाहनचालकांना जाणे भीतीदायक वाटत आहे. त्यामुळे वापराविना पडून असलेले ई-टॉयलेट आता अस्वच्छतेचे आगार बनले आहे.
‘स्मार्ट सिटी’ अंतर्गत नवी मुंबई महापालिकेने पाच वर्षांपूर्वी ठाणे-बेलापूर मार्गावर महापे येथील ई-टॉयलटचे प्रातिनिधिक स्वरूपात उद्घाटन केले होते. त्यांनतर याच मार्गावर ९ ठिकाणी लाखो रुपये खर्च करून ई-टॉयलेट उभारले आहेत. यात पावणे उड्डाणपूल, महापे स्कायवॉकजवळ, एमआयडीसी कार्यालयानजीक, रिलायन्स कंपनीजवळ, तळवली नाका, रबाळे पोलिस ठाणे, सिमेन्स कंपनी व उरण जंक्शनचा समावेश आहे. या अभिनव संकल्पनेमुळे महामार्गावरील प्रवाशांना काहीअंशी दिलासादेखील मिळाला होता. मात्र, पालिकेच्या दुर्लक्षामुळे बहुतांश ई-टॅायलेटमध्ये असलेला पाण्याचा अभाव आणि बंद अवस्थेत असलेल्या विद्युत रोषणाईमुळे त्यांचा वापर होत नसल्याचे चित्र आहे. त्यामुळे पालिकेच्या या संकल्पनेलाच उतरती कळा लागल्याचे चित्र आहे.
--------------------------
ई-टॉयलेटच्या बाजूला तृतीयपंथींचा वावर असल्याच्या तक्रारी मिळाल्या आहेत. लवकरच त्याची पाहणी करण्यात येईल. तसेच त्यासंदर्भात पोलिसांना पत्र देण्यात येईल.
- बाबासाहेब रांजळे, उपायुक्त, घनकचरा व्यवस्थापन